مصر بتعد خطة لتطوير قطاع السياحة علشان يكون أهم مصدر من مصادر الدخل الدولاري لمصر من الخارج والمرة دي من سياحة اليخوت.. ياتري اية حكاية سياحة اليخوت.. واية مستهدفات الاقتصاد المصري منها.
من سنين طويلة والحكومة بدأت تنفذ برنامج اقتصادي بالتعاون مع صندوق النقد الدولي وهدفه هو تعظيم وزيادة إيرادات الدولة من مصادر الدخل الدولاري، وعلشان مصر توصل للهدف ده فالحكومة استهدفت تعظيم الإيرادات الدولارية من كل مصادر الدخل الدولاري وطبعا مفيش اهم من قطاع السياحة واللي بيعد واحد من اهم مصادر الدخل الدولاري لمصر من الخارج.
وعلشان الدولة توصل لهدفها وتزود عدد السائحين الوافدين لمصر، فالحكومة استهدفت استنباط عدد كبير من أنواع السياحة واللي كانت مش معروفة في مصر، زي السياحة العلاجية وسياحة المؤتمرات وسياحة اليخوت والسياحة الشاطئية والسياحة الثقافية، وأنواع تانية كتيرة من انواع السياحة واللي بقي لها جمهورها حوالين العالم.
الدولة علي مدار السنين اللي فاتت استهدفت تنمية البنية التحتية لجذب كل شرائح السائحين حوالين العالم، وده من خلال استغلال الحضارة المصرية القديمة لزيادة الوافدين بهدف الاستمتاع بالسياحة الثقافية والحضارة المصرية القديمة، وكمان استهدفنا زيادة السياحة الشاطئية واللي بتستهدف الاستفادة واستغلال المساحات الشاطئية الواسعة لمصر واللي بتوصل لـ3000 كيلو متر من السواحل الساحرة، ده غير طبعا استغلال البحيرات المالحة والرمال اللي بتعالج أمراض العظام والحشونة في الترويج للسياحة العلاجية، بالاضافة طبعا لاستغلال الجهود اللي قامت بيها الدولة لاستغلال البنية التحتية الكبيرة اللي قامت بيها الدولة في المجال الصحي وتطوير المستشفيات ودخول استثمارات جديدة للقطاع الخاص ودخول تكنولوجيا جديدة في مكافحة الأمراض، واللي كانت سبب اساسي في زيادة عدد الوافدين لمصر بعرض السياحة العلاجية.
طيب اية حكاية سياحة اليخوت واية مستهدفات الاقتصاد المصري منها ؟.
في الفترة اللي فاتت الحكومة شكلت لجنة وزارية عليا لوضع استراتيجية لجذب سياحة اليخوت إلى مصر برئاسة وزير النقل وعضوية وزراء السياحة والآثار والمالية والاتصالات وتكنولوجيا المعلومات وبعض الجهات التانية في الدولة، والاستراتيجية دي بتتركز في دعم وتعظيم سياحة اليخوت بالاعتماد علي 6 محاور رئيسة أولهم إنشاء سياسة سعرية موحدة وتقديم تخفيضات وحوافز جاذبة للسفن واليخوت السياحية.
استراتيجية الدولة لجذب سياحة اليخوت بعتمد كمان علي رفع كفاءة المواني السياحية الموجودة حاليًّا، وصيانة المواني سواء السياحية أو التجارية واللي بها أرصفة سياحية ورفع كفاءتها بصفة دورية، وإعداد خطة تسويقية للترويج لسياحة اليخوت وتشجيع السياحة البحرية.
الخطة الحكومة لجذب سياحة اليخوت استهدفت كمان إنشاء منصة إلكترونية فيها كل الجهات المعنية بسياحة اليخوت بهدف تبسيط الإجراءات والحصول على الموافقات الأمنية، والنافذة الجديدة لليخوت بتيح للزائرين الحصول على موافقة واحدة، واستلام فاتورة واحدة إلكترونيًّا بالدولار الأمريكي، وكمان بتستهدف تقليص الوقت اللازم لإصدار موافقة السلطات على اليخوت لتصبح بين 3 إلى 6 ساعات، واخير استراتيجية الدولة لجذب سياحة اليخوت بتستهدف كمان إنشاء كود موحد لكل الجهات المعنية العاملة بالمراين السياحية والمواني المصرية لتوحيد متطلباتها.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
