يا ترى إيه اللي حصل وخلا نسب الإشغالات السياحية في مصر توصل لأرقام قياسية الصيف ده، وإزاي المدن الساحلية بقت كاملة العدد في عز الموسم، والأرقام دي معناها إيه؟
في الحقيقة، الصيف السنة دي كان استثنائي للسياحة في مصر، فمن يناير لحد يونيو بس استقبلنا حواري 8.7 مليون سائح، يعني زيادة حوالي 24% عن نفس الفترة السنة اللي فاتت.
وده انعكس على نسب الإشغالات الفندقية اللي وصلت في مدن زي الساحل الشمالي والعلمين ل 100%، وفي الغردقة ومرسى علم حوالي 90%، أما شرم الشيخ فالإشغال وصل ل 80%، والتوقعات بتقول إن لو الوتيرة دي كملت، ممكن نوصل ل 18 مليون سائح مع نهاية السنة وذه رقم ضخم جدا.
طب إيه السر ورا الطفرة دي؟
أولا دعم الدولة الكبير لقطاع السياحة وتطوير البنية التحتية للمدن السياحية، بجانب حملات الترويج النشطة، وده طبعا بجانب الاستقرار السياسي والأمني اللي لعب دور أساسي مع تنظيم فعاليات فنية وسياحية كبيرة جذبت الزوار خاصة من دول الخليج.
ونقدر نقول، ان السياحة العربية كانت الحصان الأسود خاصة من السعودية والإمارات والكويت، ومعاهم السياحة الأجنبية اللي زادت في البحر الأحمر خاصة من ألمانيا وإيطاليا وبولندا.
والسنة دي 2025 بس، اتضاف 19 ألف غرفة فندقية جديدة، وده ساعد في استقبال أعداد أكبر بدون ضغط على الخدمات، عشان كده منظمة السياحة العالمية نفسها شايفة مستقبل مشرق، وبتقول إن مصر ممكن تبقى الأولى عربيا والثالثة إقليميا في عدد الزوار بحلول 2027.
والمنظمة شايفة كمان ان مساهمة السياحة في الناتج المحلي هتوصل ل 15% خلال 3 سنين، بدل 12.1% السنة اللي فاتت والأهم إن مدن زى مرسى علم والغردقة بقت على خريطة السياحة العالمية بقوة، بعد ما شركات السياحة الأجنبية بدأت تحطها كخيار أول في برامجها خاصة مع الأسعار التنافسية وجودة الخدمات اللي بتقدمها الفنادق المصرية.
وكمان، السياحة الداخلية كان ليها دور لان كتير من المصريين اختاروا يقضوا إجازاتهم جوه البلد بدل السفر للخارج، وده كمان زود نسب الإشغال وخلق حركة اقتصادية محلية قوية.
يعني الخلاصة، السياحة في مصر عايشة أفضل أيامها، ولو استمر الوضع بنفس القوة، ممكن نشوف مواسم الجاية بأرقام ومكاسب تاريخية، وتبقى مصر وجهة عالمية أولى مش بس في المنطقة، لكن على مستوى العالم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
