احجز شقتك في مبادرة "سكن لكل المصريين 7" بـ25 ألف جنيه.. إيه الحكاية؟

نفسك في شقة بس مش عارف تبدأ منين؟، وبتدور على سكن محترم وسعره على قدك؟، سمعت عن "سكن لكل المصريين 7"؟ طب تعرف إيه عن تفاصيله؟.. تعرف إنك ممكن تحجز شقة وتدفع مقدم من 25 ألف بس؟

لو بتدور على شقة ليك أو لأسرتك، يبقى مايفوتكش إعلان "سكن لكل المصريين 7".. الفرصة بدأت من يوم الاثنين 28 يوليو 2025، والحجز مفتوح لكل الفئات، سواء محدودي أو متوسطي الدخل.

الوحدات موجودة في مدن ومحافظات كتير، بمساحات من 75 لـ 90 متر، وعلى حسب نوع الوحدة، هتدفع مقدم من 25 لـ 50 ألف جنيه.. والمميز في الإعلان ده، إنك تقدر تدفع المصاريف أونلاين! يعني مفيش زحمة ولا طوابير في البريد.. ولأول مرة، فيه شقق "إسكان أخضر"، صديقة للبيئة، بتقلل من استهلاك الكهرباء والمياه.

طيب مواعيد التقديم إيه؟.. الفترة الأولى مخصصة لذوي الهمم من 28 يوليو لـ 4 أغسطس، بعدها التقديم مفتوح لكل الناس لحد يوم 30 أكتوبر 2025، ولو كنت مقدم قبل كده في "سكن لكل المصريين 5"، عندك فرصة تقدم من 28 يوليو لـ 28 أغسطس.

طيب المقدم كام والدفع بيكون إزاي؟

مقدم الحجز بيبدأ من 25 ألف جنيه لو الشقة جاهزة، و50 ألف جنيه لو لسه تحت الإنشاء، والتسليم بيكون خلال 3 سنين، وفيه كمان مصاريف إدارية وتسجيل 700 جنيه.. طب مميزات الدفع إيه؟.. إنك بتدفع فابدة 8% لمحدودي الدخل، و12% لمتوسطي الدخل، والتقسيط كمان ممكن يوصل لـ 20 سنة!

وإزاي بنشتري كراسة الشروط؟

هتشتري كراسة الشروط من أي مكتب بريد مميكن، فيها كل التفاصيل، وتقدر تدفع المقدم والمصاريف من البريد أو أونلاين زي ما مكتوب في الكراسة.. بعدها، بتعمل حساب على موقع صندوق الإسكان الاجتماعي، وتملأ الاستمارة، وترفع أوراقك كلها بصيغة PDF.

بس خلي بالك من الشروطبس فيه حاجة مهمة جدًا لازم تاخد بالك منها وأنت بتقدم، وهي أنك لازم تكون مصري الجنسية، وسنة يكون ما بين 21 و50 سنة، والمهم ما تكونش استفدت قبل كده من شقق مدعومة ولا خدت قرض أو دعم من الدولة لشراء سكن.

طيب إيه المستندات المطلوبة؟

هتحتاج تجهز بطاقة الرقم القومي ليك ولزوجتك وشهادة دخل أو مفردات مرتب وقسيمة الجواز وإيصال كهربا أو غاز حديث.

الخلاصة؟.. أن الفرصة بين إيديك ولو نفسك في شقة بجد، الحق قدم قبل ما الوقت يفوت ومتنساش تشوف كراسة الشروط كويس قبل أي خطوة!