يا ترى إزاي الحكومة بتستخدم التسهيلات الضريبية والجمركية علشان تشجع الاستثمار، وإزاي ده جزء من خطة إصلاح اقتصادي بتستهدف تنمية مستدامة؟
في الفترة الأخيرة، الدولة ماشية بخطة إصلاح اقتصادي واضحة، وبتحاول تخلق مناخ جاذب للاستثمار سواء محلي أو أجنبي.
وواحدة من أهم أدوات الخطة دي هي التسهيلات الضريبية والجمركية.. طيب يعني إيه؟
يعني ببساطة، المستثمر اللي كان بيخاف يدخل السوق المصري بسبب تعقيدات أو أعباء ضريبية، انهاردة بقى عنده فرصة يشتغل في بيئة مشجعة ومحفزة.
ومن هنا، قال وزير المالية أحمد كجوك انهم بيشتغلوا على سياسات مالية جديدة بتدفع النشاط الاقتصادي لقدّام، سواء في الإنتاج أو التصدير، وده بيحصل من خلال حوافز ضريبية وتسهيلات جمركية بتقلل العبء على المستثمر وبتسرّع حركة الاستيراد والتصدير.
يعني مثلا، لو مستثمر عايز يدخل خامات أو معدات للمصنع بتاعه فالتسهيلات الجمركية دي بتقلل عليه الجمارك أو بتسرع التخليص الجمركي، فالمشروع يبدأ أسرع ويكسب أسرع.
واللي أهم من كده، إن السياسات دي مش معمولة بس علشان الاقتصاد يتحرك شوية، لأ ده الهدف هو جذب استثمارات طويلة المدى في مجالات استراتيجية زي الطاقة والصناعة والبنية التحتية،والزراعة.
وده ظهر بوضوح في اللقاء اللي جمع وزير المالية بالمهندس أديب الأعمى، الرئيس التنفيذي للمؤسسة الدولية الإسلامية لتمويل التجارة، واللي أكد على دعمهم لجهود مصر في تعزيز تنافسية الاقتصاد، والتعاون ده مع مؤسسات دولية كبيرة، بيدي ثقة أكبر للمستثمرين وبيأكد إن مصر ماشية على الطريق الصح.
والميزة الكبيرة كمان، إن التسهيلات دي مش بس بتستهدف الكبار، لأ ده كمان في برامج دعم للمشروعات الصغيرة والمتوسطة علشان تشتغل وتكبر وتصدر.
يعني الخلاصة، هي إن التسهيلات الضريبية والجمركية مش رفاهية، دي ركيزة أساسية في خطة الدولة علشان تحفز الاستثمار وتحقق تنمية مستدامة وتخلي مصر بيئة جاذبة مش طاردة، وكل ما زادت الاستثمارات كل ما الاقتصاد يقوى والبطالة تقل والصادرات تعلى والجنيه يقف على رجليه، بس المهم الحكومة تتفذ البرنامج ده للنهاية، لأن كل خطوة في الملف ده بتفرق، وكل قرار اقتصادي بيأثر على حياتنا اليومية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
