سر تأجيل "ترامب" الرسوم الجمركية.. وتأثيره على الاقتصاد العالمي

يا ترى ليه فجأة الرئيس الأمريكي دونالد ترامب قرر يأجل الرسوم الجمركية اللي كان ناوي يفرضها، وهل القرار ده هيهدي السوق ولا هيولعها أكتر؟

في الحقيقة، كان المفروض يوم 9 يوليو يبقى بداية تنفيذ رسوم جمركية جديدة فرضها الرئيس الأمريكي دونالد ترامب على مجموعة من الدول والمنتجات، بس فجأة قرر يأجل القرار ده لشهر أغسطس الجاي، وقال ندي فرصة أكتر للمفاوضات.

والكلام ده معناه، إن  سبب التأجيل هو، الشركات الأمريكية اللي بدأت تقلق، والاقتصاديين شايفين إن الرسوم دي هتضرب في الأسعار والمستهلكين مش هيسكتوا، ومن هنا  ترامب قرر يكسب وقت ويبعث رسالة تهديد ناعمة للدول اللي بيضغط عليها في التفاوض.

" title="سر تأجيل "ترامب" الرسوم الجمركية.. وتأثيره على الاقتصاد العالمي" frameborder="0">

يعني الرسوم دي خطر؟
أيوه، معظم الخبرا شايفين إنها زي الضريبة، بس على الاستيراد، يعنى لما تفرض رسوم على السلع اللي داخلة أمريكا، الشركات هتتحمل التكلفة؟ لأ طبعا دي هتعديها للمستهلك، يعني الأسعار هتعلى واللي هيدفع الفاتورة هو المواطن العادي.

وحاليا، أمريكا مش بتستورد حاجات ترفيهية وخلاص، ده نص وارداتها تقريبا عبارة عن مكونات بتدخل في صناعات كبيرة زي الطيارات والعربيات، يعني لما المكونات تغلى الإنتاج كله يتأثر، وده معناه تباطؤ اقتصادي وممكن تضخم.

والغريبة هنا ان لحد دلوقتي، الرسوم اللي اتطبقت ما أثرتش بشكل مباشر على التضخم أو النمو، بس زي ما وزير الخزانة الأمريكي قال ان ده الكلب اللي لسه ما نبحش، يعني التأثير جاي بس متأخر شوية، وممكن يفاجئ الاقتصاد في أي لحظة.

وفي دراسات كتير بتقول إن كل مرة أمريكا فرضت رسوم جمركية، الأسعار زادت، والتكلفة اتحملت على المستهلك مش التاجر، وفي دراسة من الاحتياطي الفيدرالي قالت إن تكلفة الرسوم كانت بالكامل على جيب المواطن.

طيب ترامب ليه بيعمل كده؟
بصراحة، هو شايف إن ده وسيلة ضغط تفاوضي، بس في نفس الوقت في تخوفات إن السياسات دي ترجع أمريكا لورا، لان كل اللي كانت كسباه من التجارة الحرة ممكن تخسره، وده يأثر على مكانتها في الاقتصاد العالمي.

والخلاصة، هي ان تأجيل الرسوم مش معناه إن المشكلة اتحلت، هو مجرد هدنة، والأسواق العالمية لسه مستنية تعرف إيه اللي هيحصل في أغسطس، هل ترامب هيرجع يفرض الرسوم ويولعها؟ ولا هيتوصل لاتفاقات توقف النزيف قبل ما يبدأ؟