أكد الإعلامي عمرو أديب أن العالم الغربي يدعم إسرائيل بشكل كامل، مشيرا إلى أنه لن يتدخل لوقف عدوانها على دول المنطقة على الإطلاق.
وقال أديب خلال برنامج "الحكاية" المذاع على قناة "إم بي سي مصر": "بالمناسبة لكل الناس اللي عندها أمل في العالم الغربي وآخره، هقوللكم حاجة هتضايقكم العالم الغربي يعشق إسرائيل مش معلومة جديدة يعني، بس للتذكرة العالم الغربي يعشق إسرائيل، ظالمة أو مظلومة بيعشقها عشق".
وأضاف: "الحقيقة اللي أمرّ إن العالم الغربي، عايز استخدم كلمة ما تضايقكوش، لا يحب العالم الشرقي، ما بيحبوناش قوي إحنا بالنسبة لهم، العرب، المسلمين، لا يعني إنما النموذج هو إسرائيل، الديمقراطية، التقدم، الأبحاث، المعامل، جوائز نوبل إنما العالم الشرقي لا يعني".
وتابع: "كل حين ومين كده يجي يقول لك يا جماعة، لا، بشوش على الناس بتوع الشرق دول ما تقتلوهمش قوي، الأطفال اللي بتموت، الفلسطينيين مش لاقيين ياكلوا، حاجات كده من باب إنه ينام بالليل ضميره مرتاح".
وواصل: "هم يعشقون إسرائيل، عشق بقناعة، بقناعة ويدافعون أنا أتحدى إنه في دولة في العالم بيتم الدفاع عنها من كل دول العالم زي ما الدول اللي بتدافع عن إسرائيل يعني مثلًا سويسرا، هولندا، فرنسا، عمرك ما هتلقى كتلة في العالم بتدافع عنهم".
وأكمل: "إنما هات أي جنسية غربية، في الغالب يعني، مش كلهم يعني، هيبقى في شوية كده برضه اللي هم بتوع حقوق إنسان ومش عارف إيه أما تيجي يتكلموا عن إسرائيل، ينتفض إسرائيل؟ هو اللي بيتعمل في إسرائيل ده؟".
وأوضح: "ده لغاية دلوقتي، تقول له يا عمي، إن إسرائيل هي اللي ابتدت، يقول لك: لا، ده هي الموضوع ابتدى لما الإيرانيين كانوا عايزين يغتالوا مش عارف مين من أربع ستين يا راجل، أنا بقول لك إيه اللي حصل هو مين؟".
واختتم: "اسأل أي غربي كده من الذي بدأ الحرب؟ يقول لك لا لا، حرب إيران، هي اللي ابتدت إسرائيل؟ لا، إسرائيل إسرائيل؟ كمل إسرائيل جميلة إسرائيل ننوسة ننوسة عين العالم هي إسرائيل ليه بقى وبتاع ومش عارف إيه نبقى نعمل ندوة، نجيب ندوة، ونفتح الكتاب من أيام هيرتزل بقى والدولة اليهودية، ونجيب من الأول إنما حقيقة الأمر هم يعشقون إسرائيل، والعالم مستعد يعمل أي حاجة لإسرائيل".
