منصات بانكير قدمت النهاردة عدد من التقارير المهمة في الشأن الاقتصادي والمالي، والبداية مع تقرير خاص عن كواليس التجارة بين مصر والولايات المتحدة الأمريكية في الفترة الجاية .
وشرح التقرير إن مصر خلال الأيام اللي فاتت بتعمل محاولات تقارب مكثفة مع أمريكا.. وده مش مجرد كلام مرسل.. ولكن قرارات وإجراءات فعلية على أرض الواقع.. رئيس الوزراء مصطفى مدبولي قالها صراحة في منتدى الأعمال المصري الأمريكي النهاردة إن فيه اهتمام متزايد من مصنعي السيارات الأمريكية لدخول السوق المصرية.. ومش بس كده.. لا ده كمان أصدر مرسوم بيلغي كل المتطلبات اللازمة لدخول السيارات أمريكية المنشأ لمصر.. وده معناه إن سوقنا بقى مفتوح تماماً قدام العربيات المصنعة في أمريكا.
وسلط التقرير الضوء على أزمة الألبان الأمريكية وقال إن موضوع الألبان الأمريكية ده بقى حكاية تانية خالص.. رئيس الوزراء قال إن فيه قرار "غير مسبوق" بإعفاء منتجات الألبان الأمريكية ومشتقاتها بشكل دائم من متطلبات شهادة الحلال لما تيجي تتصدر لمصر.. يعني شركات الألبان الأمريكية هتدخل سوقنا بقوة أكبر.. القرار ده ساري لغاية نهاية 2025.. يعني ممكن تصدر الألبان الأمريكية لمصر من غير شهادة حلال أو رسوم ليها.. وبعد 2026 هتبقى الرسوم حوالي 1500 دولار لكل حاوية.
مدبولي كمان قال قدام أكتر من 150 مسؤول من الشركات الأمريكية إن مصر وصلت للمرحلة النهائية في اتفاقية مع أمريكا بخصوص الجمارك.. وده بيأكد إن فيه أكتر من 1800 شركة أمريكية شغالة في مصر باستثمارات تراكمية معدية 47 مليار دولار في آخر عقدين.
وحدة أبحاث بانكير قدمت تقرير مختلف عن اللي هيحصل في سوق السيارات المصري بعد تصريحات وقرارات كامل الوزير وزير الصناعة والنقل.
وقال التقرير إن الحكومة المصرية كانت حاضرة بقوة النهاردة في منتدى الأعمال المصرى الأمريكي اللى نظمته غرفة التجارة الأمريكية وحضره قيادات سياسية واقتصادية مهمة جدا من مصر وأمريكا وطبعا السفارة الأمريكية كانت حاضرة بقوة..
ولفت بانكير إن المنتدى دا حصلت فيه مفاجآت من العيار التقيل أولها اللي كشفتها السفيرة الأمريكية في القاهرة بخصوص خطوة تاريخية في التعاون بين البلدين وهي اتفاق جديد هيسهل التجارة وهيعزز الإصلاح الاقتصادي في مصر..
وكشف التقرير إن السفيرة الأمريكية أعلنت عن مفاجأة تانية وهي تدشين شراكة قوية بين مصر والولايات المتحدة في الذكاء الاصطناعي والتكنولوجيا الحديثة وكمان السفيرة قالت إن مصر بتتجه بقوة لتصبح مركز إقليمي لريادة الابتكار الرقمي والتعاون مع شركات أمريكية هيدعم تدريب الكوادر المصرية ويقوي منظومة ريادة الأعمال في مجالات متقدمة زي الحوسبة السحابية والبيانات الضخمة.
وسلط التقرير الضوء على إعلان كامل الوزير وزير الصناعة خلال المنتدى إلغاء كافة قيود دخول قطع غيارات السيارات الأميركية وتوفير كافة إجراءات بدء تصنيع السيارات الأميركية في مصر وإنه بكده تم حل مشاكل استيراد السيارات مع أميركا.. الوزير كشف كمان خلال منتدى الأعمال المصرى الأمريكي أن مصر أصبحت جاهزة لاستقبال السيارات الأمريكية على مدار اليوم.. وتأكيده حل كافة المشكلات المتعلقة باستيراد السيارات بالتعاون مع الجانب الأمريكي ودا في إطار تعزيز التكامل الاقتصادي والتجاري بين البلدين.. ومش كده وبس دا كمان كامل الوزير أعلن عن توفير كافة الإجراءات اللازمة لبدء تصنيع السيارات الأمريكية في مصر وقال إن القرار هيفتح آفاق واسعة للاستثمار المحلي والأجنبي في قطاع السيارات ويعزز من مكانة مصر كوجهة مفضلة لصناعة السيارات في المنطقة.
وشرح التقرير إن الايام الجاية بتمثل مرحلة جديدة من التعاون الاقتصادي بين مصر والولايات المتحدة وعارفين إن العلاقات مع أمريكا ومصر استراتيجية وقديمة والولايات المتحدة بتستقبل حجم صادرات مصرية ضخمة وكمان فيه زي شراكة بين البلدين.. واللي حصل النهاردة في المنتدى بيقول إن مصر هتتحول لقاعدة لصناعة السيارات الأمريكية في المنطقة وهيكون فيه منافسة مع الشركات الصينية اللي بدأت فعلا تعمل مصانع ليها في مصر وخاصة في المنطقة الاقتصادية لقناه السويس.. وطبعا اي مصانع جديدة للسيارات ولقطع الغيار معناه معروض كتير واسعار تنافسية وفي الآخر المواطن هو المستفيد لما الاسعار تنزل.
ولفت التقرير إن في الاقتصاد مفيش عواطف لكن فيه تعاون واستثمارات ومصالح مشتركة وكله بيجري على مصلحته ومصر زي اي دولة بتشوف مصلحتها فين وتعملها وفي نفس الوقت بترتبط بعلاقات جيدة وممتازة مع اغلب الدول العالم والتكتلات الاقتصادية والمالية وكمان مصر قدرت تسوق لنفسها ولامكانياتها بشكل ممتاز في الفترة الأخيرة وتستفيد من البنية الأساسية الحديثة والموانئ وخطوط التجارة الدولية والموقع الجغرافي المتميز وقدرت فعلا تجذب مليارات الدولارات في فترة صغيرة ودي مجرد بداية.
منصات بانكير قدمت تقرير خاص النهاردة كمان عن البنك الصيني الجديد اللي قرب يفتتح مقره في مصر
وسلط التقرير الضوء على ارتفاع حجم التعاون بين مصر والصين في الفترة الأخيرة وخاصة في قطاع الاستثمارات وعارفين بردو إن الصين بتعتبر وحش استثماري في مصر وحصلت قفزة في استثماراتهم في مصر وخاصة في المنطقة الاقتصادية لقناه السويس واللي الصينيين ضخوا فيها حوالي 4 مليار دولار من أصل 8.3 مليار دولار استقطبتهم المنطقة ودا لأن الصين عملت منطقة صناعية ضخمة هناك وطلبت أراضي تاني ضخمة بردوا لتوسيع استثماراتها.
وشرح بانكير إن مصر بتترقب في الأيام الجاية زيارة الرئيس الصيني للقاهرة واللي هتفتح ابواب جديده في التعاون والاستثمار في كل المجالات وهتكون زيارة نوعية ودمت حيث نتائجها ومش عاوزين ننسي إن فيه شراكة استراتيجية شاملة بين والصين وكمان تعاون مشترك في مجموعة البريكس..
وكشف التقرير إن الحكومة المصرية دلوقتي شغالة في محادثات مع الحكومة الصينية لجذب أحد البنوك الصينية الضخمة للعمل داخل السوق المصرية.. وقال إن دي خطوة غير مسبوقة عشان تسهيل المعاملات المالية للشركات الصينية العاملة في مصر وتعزيز آفاق التعاون الاقتصادي بين الجانبين ودا اللي أكد عليه وليد جمال الدين، رئيس المنطقة الاقتصادية لقناة السويس.
وقال جمال الدين كمان إن وجود بنك صيني في مصر أصبح أمرً مهم وملح لدعم الشركات الصينية من خلال تمكينها من التعامل بعملتها المحلية (اليوان) إلى جانب فتح آفاق جديدة للتعاون السياحي والتجاري وهنا مربط الفرس وهو توسيع التعاملات بالعملة الصينية يعني الشركات الصينية مش هتحتاج تتعامل بالدولار مع مصر ولا تطلب تمويلات من البنوك المصرية بالعملة الأمريكية وهتتعامل بالجنيه واليوان ودا طبعا ضربة للدولار وتقليل الاعتماد عليه.
ولفت التقرير إن خطوة البنك الصيني في مصر هتساعد وتشجع شركات صينية جديدة للدخول للسوق المصري وخاصة أن مصر بتسعى لتعظيم الاستثمارات الصينية وخاصة في مجال التصنيع من أجل التصدير بخلاف تلبية احتياجات السوق المحلية وتشجيع توطين الصناعات الأجنبية بشكل عام بيساعد في تحقيق أهداف مصر في تعميق التصنيع المحلي وخلق فرص عمل وزيادة عوائد التصدير والموارد الدولارية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
