مصر عندها خطط أنها تتحول لمركز اقليمي للتبادل التجاري والنقل الجوي في افريقيا ومنطقة الشرق الأوسط، بس المرة دي هتكون في صناعة مختلفة هتدخلها مصر وهتكون سبب في تغيير خريطة المنطقة بأكملها.. يا ترى اية هيا الصناعة دي .. وازاي هتغير الخريطة في الشرق الأوسط.
الفترة الرئاسية الجديدة مصر عندها خطط أنها تتغير وتعمل نقله نوعية في الصناعة بشكل عام، بس المرة دي هتكون صناعة مختلفة جدا وهيا الطيران، خصوصا أن مصر واحدة من الدول الرائدة تقديم خدمات صيانة الطائرات بمختلف أنواعها في قارة أفريقيا ومنطقة الشرق الأوسط بشكل عام.
علشان مصر تكمل ريادتها في ملف الطيران كان لازم يكون في عقود شراكة بين الحكومة وبين كبري شركات تصنيع الطائرات في العالم، وده اللي عملته الحكومة وشكلت وفد برئاسة الدكتور سامح الحفني وزير الطيران المدني واللي زار مصنع إيرباص في فرنسا علشان يتعرض علي التكنولوجيا الحديثة في تصنيع الطائرات هناك، والحاجات والتعديلات الجديدة اللي اضافتها الشركة علي الموديلات الجديدة للطائرات، خصوصا أن مصر عندها تعاقد حاليا مع الشركة الفرنسة لشراء 10 طائرات جديدة هتدخل ضمن اسطول الشركة الوطنية مصر للطيران.
الزيارة اللي قام بيها وفد الحكومة برئاسة وزير الطيران المدني الدكتور سامح الحفني، والطيار أحمد عادل رئيس شركة مصر للطيران، جاية في أطار خطة لتطوير قطاع النقل الجوي المصرى بالتعاون مع كبرى الشركات المصنعة للطائرات فى العالم وده بهدف تعزيز مكانة مصر كمركز إقليمي للنقل الجوي في منطقة الشرق الأوسط وأفريقيا خصوصا أن العلاقات بين مصر وفرنسا حاليا في أزهي عصرها بعد الزيارة التاريخية اللي قام بيها الرئيس الفرنسي إيمانويل ماكرون لما جه زار مصر وقام بجولة سياحية بين معالم مصر القديمة ونزل الشارع في الحسين وقعد علي قهوة وشاف حفاوة المصريين بوصله وكان فرحان جدا بالترحيب والحب اللي شافه من الشعب المصري.
زيارة وفد وزارة الطيران المدني لمقر شركة إيرباص استهدفت كمان التعرف علي خط التجميع النهائي لطائرات A350، والوفد اطلع على مراحل التصنيع الدقيقة والتقنيات الحديثة المستخدمة في إنتاج طرازات إيرباص A350، ده غير أنهم زاروا مركز التدريب التابع لشركة إيرباص واللي بيعد واحد من أبرز المراكز المتخصصة في تدريب الطيارين وفرق الصيانة في العالم.
الوفد المصري كان حريص جدا علي التعرف علي الخطط المتبعة في برامج الصيانة، وهناك الوفد عمل تجربة محاكاة متكاملة لطائرة A350، علشان يتتعرفوا على الإمكانات التدريبية المتقدمة اللي بيوفرها المركز خصوصا أن مصر عندها مركز لصيانة ممثلة في شركة مصر للطيران للصيانة والأعمال الفنية واللي بيقدم خدمات الصيانة لأكبر شركات الطيران العالمية في مطار القاهرة والمطارات الأقليمية، والحكومة عندها خطة أنها تتوسع في برامج التدريب والصيانة خصوصا أن النوع ده من الخدمات بيكون بالعملة الصعبة وده جاي في أطار خطة الدولة لزيادة ايراداتها من العملات الأجنبية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
