٣٠٠ مليون جنيه عشان تطوير حمامات مطار القاهرة.. رقم أول ما تسمعه تحس إنه مبالغ فيه.. بس لما ندخل في التفاصيل.. نلاقي إن الموضوع أكبر من مجرد حمامات.
طب إيه اللى عملته الحكومة؟.. وليه التكلفة دي كلها عشان تطوير الحمامات.
وزير الطيران المدني سامح الحفني وضّح إن مطار القاهرة بيستقبل أكتر من ١١٠ آلاف مسافر يوميًا.. وده معناه ضغط غير عادي على دورات المياه.
وعشان كده الوزارة خصصت ٣٠٠ مليون جنيه لتطوير وتحديث أكتر من ١٠٠ دورة مياه موزعة على صالات السفر والوصول.
التطوير مش تجديد تجميلي وخلاص.. لكن شمل:
- تجهيز حمامات خاصة بذوي الهمم متوافقة مع المعايير الدولية.
- تركيب أنظمة حديثة للسباكة وتوفير استهلاك المياه.
- إضاءة وتهوية ذكية بتقلل استهلاك الكهرباء.
- تصميم داخلي مريح يخلي تجربة المسافر أرقى.
- وأهم نقطة: خطة صيانة ومتابعة لحظية تمنع الأعطال والزحام اللي كان بيشتكي منه المسافرين قبل كده.
الوزير قال كمان إن الحكومة بترد على الشكاوى اللي وصلت من المواطنين، سواء عن الحمامات أو عن عربيات نقل الأمتعة اللي كانت مرتبطة بـ"ثقافة البقشيش". وعلشان كده الوزارة ألغت التعاقد مع الشركة القديمة، وجابت شركة جديدة تدي خدمة أنضف وأكتر تنظيم.
لكن لازم نربط الصورة الكبيرة.. تطوير الحمامات جزء من مشروع ضخم لتطوير مطار القاهرة كله.
المشروع تكلفته ٤.٥ مليار دولار، والهدف يرفع الطاقة الاستيعابية للمطار لـ ٦٠ مليون راكب سنوياً.
وده يشمل إنشاء مبنى ركاب جديد – مبنى ٤ – بسعة استيعابية ٣٠ مليون راكب، ومدرج جديد مجهز بأحدث أنظمة الملاحة والإضاءة الأرضية، وكمان مواقف سيارات كاملة مغطاة بالألواح الشمسية.
يعني ببساطة.. المطار بيتحوّل لبوابة عصرية تنافس المطارات العالمية، سواء في التفاصيل الصغيرة زي دورات المياه أو في المشروعات العملاقة زي مبنى الركاب الجديد.
الرقم – ٣٠٠ مليون – ممكن يثير جدل، بس في النهاية الحكومة شايفة إن تجربة المسافر بتبدأ من أول ما يدخل المطار.. حتى من أبسط حاجة: الحمام.
والسؤال اللي بيفضل مطروح: هل بعد الاستثمارات دي مش هتشوف شكاوي تاني في مطار القاهرة.. وندخل بقوة في قائمة أفضل مطارات العالم؟.. الأيام الجاية هتثبت.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
