أكد الإعلامي احمد موسى أن رئيس وزراء دولة الاحتلال بنيامين نتنياهو يحاول إنهاء الأمور في قطاع غزة بشكل سريع بسبب الضغوط التي يتعرض لها.
وقال موسى خلال برنامج "على مسؤوليتي" المذاع على قناة "صدى البلد": "هو النهارده بيعمل إيه؟ شايف الضغوط وشايف اللي بيحصل عنده وعايزين يخلصوا بسرعة، وواخد دعم هائل من ترامب، هائل من ترامب".
وأضاف: "نتنياهو يعمل إيه؟ يقول لك الفلسطينيين عايزين يمشوا، مفيش فلسطيني عايز يسيب بلده؟ مفيش ولا واحد حتى الأطفال الصغيرين قالوا أرضنا وهنقعد عليها طب ما هو عايز يمشي؟ كان يفكر يمشي من 2023، لكن بيتحملوا الإبادة المستمرة والمحرقة اللي نتنياهو بيرتكبها في قطاع غزة بيرتكب محرقة في غزة، محرقة بيرتكبها في غزة سابوا؟ ما سابوش، متمسكين بأرضهم وبلادهم".
وتابع: "أهو بيضرب كل الأبراج، كل الأبراج. أهو امبارح، النهارده، كل الأبراج بيدمرها. قال لك: مش هيخلي ولا مبنى مرتفع في غزة، لا مبنى مرتفع ولا مبنى قائم كل المباني متدمرة كله، وجنبه خيام شايفوا الخيام؟ كله خيام يعني ناس قاعدة في الشارع".
وأوضح: "الشعب الفلسطيني متمسك بكل شبر من أرضه لن يترك غزة، غزة لن يترك غزة مهما فعل نتنياهو وغزة ستكون مقبرة نتنياهو بإذن الله، ستكون نهاية نتنياهو غزة لن يحقق اللي هو عايزه هيدفع ثمن الإجرام والإبادة والمحارق اللي بيرتكبها داخل قطاع غزة".
وأكمل: "اتكلم على مصر وقال لك مصر أنا هفتح… هو بيقول لما قال أنا هفتح، ما احنا عارفين الموضوع. واحنا طول الوقت بنقول مين؟ معبر رفح منذ شهر إبريل أو مايو 2024 تحت سيطرة جيش الاحتلال المجرم بعد ما دخل وخد هذه المنطقة خلاص بقى هو اللي موجود هناك وأنا هتعامل معاه، مش هتعامل معاه؟"
وواصل: "ويطلع تنظيم الإخوان الإرهابي ويطلع الطابور الخامس الخاين ويطلع كل من تحالف مع تنظيم الإخوان الإرهابي مع الصهاينة يعملوا بقى حملات افتحوا معبر رفح! طب ما انت شفت نتنياهو قال لك إيه؟ قال لك أنا اللي قافل معبر رفح من الناحية التانية ومصر، احنا معبرنا معانا مفتوح للمساعدات لكن هو، الناحية التانية، عايز النهارده يقول لك: أنا هفتح من عندي، بس خلوا المصريين يفتحوا. لا، المصريين مش هيفتحوا، مش هيسمحوا بالتهجير احنا مش هنسمح بالتهجير. هو عايز يفتح عشان يعمل إيه؟".
واختتم: "اللي طلعوا وعملوا مظاهرات وشتموا مصر والحملات اللي ضد بلدنا، نتنياهو النهارده فضحكم كلكم كل واحد أساء لمصر شريك مع نتنياهو نتنياهو قال أيوه، أنا ضحكت عليكم اعترف إنه هو اللي قافل".
