هنتحول لواحدة من اقوي الدول في صناعة الدواء، وهزود صادراتها لكل دول العالم... ياتري اية اللي بتعمله مصر في مجالات صناعة الدواء.. وليه مصر مهتمة جدا بالصناعة دي.. وامتي هنشوف مدن طبية متكاملة زي الدول اللي برا عندنا في مصر.
من كام ساعة كان في اجتماع مهم جدا للرئيس عبدالفتاح السيسي مع الدكتور مصطفى مدبولي، رئيس مجلس الوزراء، والدكتور خالد عبد الغفار، نائب رئيس مجلس الوزراء للتنمية البشرية ووزير الصحة والسكان، واللي تابع فيه عدد كبير من التحديات والرؤي المستقبلية لقطاع الصحة في مصر.
واحدة من الحاجات الرئيسية اللي الرئيس عبدالفتاح السيسي ناقشها مع رئيس مجلس الوزراء ووزير الصحة والسكان هيا تطورات مشروعات البنية التحتية للقطاع الصحي، ووجّه بسرعة الانتهاء من تنفيذ مدينة النيل الطبية، ومشروع مستشفى النيل التخصصي للأطفال اللي بيتم إنشاءه في أرض معهد ناصر.
توجيهات الرئيس عبدالفتاح السيسي للحكومة تضمنت كمان وجود متابعة دقيقة لمعدلات تنفيذ المشروع القومي للمعامل المركزية بمدينة بدر، ومشروع مدينة العاصمة الطبية التابعة للهيئة العامة للمستشفيات والمعاهد التعليمية واللي هتضم 4200 سرير و 18 معهد طبي متخصص.
طيب اية سر اهتمام الرئيس عبدالفتاح السيسي بقطاع الصحة والدواء في مصر ؟.
الطب والأدوية واحدة من أهم القطاعات اللي الدولة قطعت فيها شوط كبير جدا، وخلال وقت قصير جدا مصر تحولت من دولة مستوردة لأنواع كتيرة من الأدوية والعلاجات الي دولة مصدرة وبارقام كويسة، وبقي عندنا دول مستورة وبشكل أساسي من للدواء المصري، ده غير أن الحكومة وفرت ميزانية ضخمة جدا كانت بترصدها سنويا لتوفير الأدوية المطلوبة للسوق المصري، خصوصا أن الدواء واحدة من الأدوات الاستراتيجية الأساسية اللي الحكومة مش هقدر تتخلي ولا ترفع أيدها عنه .
خطة الحكومة لتطوير صناعة الدواء مش واقفة علي توفير الدواء للسوق المصري بس، لا ده كمان في جزء كبير منها هيكون متعلق بفتح باب جديد للدولار في الناتج القومي المصري، خصوصا اننا عندنا اسواق جاهزة وفاتحة بابها المنتج المصري في أسواق كتيرة أهمهم السوق الافريقي، وده جزء من خطة مصر للتحول الي مركز إقليمي لصناعة الدواء .
طيب إزاي مصر هتتحول الي مركز إقليمي لصناعة الدواء ومستهدفات الاقتصاد من الصناعة دي كام ؟.
علي مدار الوقت اللي فات، الدولة اخذت خطوات قوية لتحويل مصر الي مركز إقليمي لصناعة الدواء، والهدف ده مدعوم من رؤى رئاسية واستراتيجيات طويلة الأجل وفي توجيهات رئاسية مستمرة من القيادة السياسية للحكومة لتوطين صناعة الدواء وتوفير حياة كريمة للمواطنين ضمن رؤية مصر 2030 واللي قائمة علي توطين الصناعات الحيوية ومنها صناعة الدواء .
وعلشان مصر توصل لهدفها بتحويل مصر الي مركز إقليمي لصناعة الدواء، فكانت اول خطوة قامت بيها الدولة هيا الاستثمار في البنية الصناعية لصناعة الدواء وده بيعتبر حجر الأساس في تحويل مصر لمركز دوائي إقليمي .
الجهود اللي قامت بيها الدولة نجحت في إنشاء 15 مصنع جديد للأدوية في 3 سنين، علشان يوصل يوصل إجمالي عدد مصانع الدواء في مصر لـ 172 مصنع، ده غير الانتهاء من تأسيس مدينة الدواء، واللي هتكون واحدة من أكبر المشاريع الدوائية في الشرق الأوسط وأفريقيا، وهتكون على مساحة 180 ألف متر مربع، وهتنتج ملايين الأنواع من الأدوية والامصال والمستلزمات الطبية والعلاجية سنويا .
خطة توطين صناعة الدواء في مصر تضمنت كمان إنشاء مجمع فاكسيرا لإنتاج اللقاحات والمتطلبات الدوائية الحيوية زي لقاحات كورونا والأنسولين واللي بقت متوفرة بإعداد وارقام ضخمة جدا للمواطنين في الصيدليات والمنافذ .
وعلشان نعمل صناعية إقليمية للدواء في مصر، كان لازم حتما ولابد من تقليل الاعتماد على الخارج في المواد الخام، والدولة أطلقت المبادرة لتوطين المواد الفعالة وغير الفعالة من خلال بناء مصنع متعدد الأغراض للمواد الخام الدوائية، بهدف تقليص الاعتماد على الاستيراد .
الدولة كمان اطلقت خطة طموحة لتوطين 30 مكون دوائي من أصل 280 دواء بيمثلوا 60% من قيمة الواردات الحالية، وحاليا كمان بيتم تجهيز مصنع مختص بالأدوية الفعالة واللي هيخرج للنور في 2027 .
التحركات اللي قامت بيها الحكومة، رفعت الصادرات المصرية الي1.5 مليار دولار في السنة المالية 2024/2025 وفي خطط لمضاعفتها خلال السنين اللي جاية، ده غير أن رفعت إجمالي صافي مبيعات الدواء المصري لـ 3.88 مليار دولار في 2023، بنسبة تصنيع محلي وصلت لـ 94%، ومصر تحوّلت من المرتبة 47 عالميا قبل 2015 إلى المرتبة 29 في 2023 من حيث حجم الصناعات الدوائية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
