يا ترى ايه حكاية الاستثمارات الجديدة اللي دخلت مصر في الايام الأخيرة واللي وصلت ل 4.8 مليار دولار، وإزاي الحكومة قدرت تجذب المبلغ الضخم ده في وقت قصير جدا؟
في الحقيقة، الحكومة المصرية أعلنت فى تقرير صادر الايام الاخيرة، إنها تلقت 973 طلب من مستثمرين ومؤسسات مالية واللي عايزين يضخوا فلوسهم في أدوات الدين المصرية، وده كله بهدف تدبير الفجوة التمويلية في الموازنة العامة للدولة.
والموضوع ببساطة هو ان وزارة المالية كانت مستهدفة تطرح أذون خزانة ب 90 مليار جنيه، لكن المفاجأة إنها استقبلت طلبات استثمار وصلت ل 230.14 مليار جنيه يعني أكتر من الهدف بكتير زي ما يكون بيعادل حوالى 4.8 مليار دولار.
ونقدر نقول، ان الاستثمارات دى اتوزعت على طروحات لمدة 182 يوم و364 يوم، بالتنسيق مع البنك المركزي اللي بيقوم بدور منظم ومترتب لأذون الخزانة. يعني مثلا طرح أذون ال 364 يوم كان مستهدف فيه 50 مليار جنيه، لكن اللي اتقدم فعليا وصل ل 87.4 مليار، اما أذون ال 182 يوم فالمستهدف كان 40 مليار جنيه لكن اللي اتقدم من المستثمرين وصل ل 142.74 مليار جنيه.
والكلام ده معناه، إن السوق المصري بقى جاذب جدا لرؤوس الأموال خاصة في أدوات الدين قصيرة الأجل وده بسبب ارتفاع العائد مقارنة بالأسواق التانية، وكمان الطلب الكبير من المستثمرين بيأكد إن في ثقة فى الاقتصاد المصرى وقدرته على الوفاء بالتزاماته.
ودي مش أول مرة نشوف فيها إقبال كبير بالشكل ده على أدوات الدين المصرية، لكن المرة دي بتيجي في وقت حساس جدا لان الاقتصاد محتاج فيه أى تدفقات دولارية جديدة عشان يدعم الاحتياطي الأجنبي ويعزز استقرار الجنيه، وده بيأكد ان الحكومة ماشية بخطة واضحة لجذب السيولة الأجنبية سواء من خلال الطروحات أو أدوات الدين أو حتى الاستثمارات المباشرة.
كمان، وجود منافسة بين المستثمرين على الطروحات دي بيخلق فرصة للحكومة إنها تختار أفضل العروض وأقل تكلفة ممكنة للاقتراض، وده فى النهاية بيساعد على تخفيف عبء الفوائد على الموازنة العامة، ومع استمرار الإقبال ده فممكن نشوف أرقام أكبر في الطروحات الجاية خاصة لو العائد فضل جاذب والاستقرار الاقتصادي استمر.
والخلاصة هي ان دخول 4.8 مليار دولار في وقت واحد يعتبر دفعة قوية لاحتياطي النقد الأجنبي، وكمان بيخفف الضغط على العملة وبيفتح المجال لمزيد من الاستثمارات في الفترات الجاية، واللي أهم بقى انه بيأكد إن في شهية قوية من المستثمرين لضخ فلوسهم في السوق المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
