علق الإعلامي تامر أمين على قرار محافظة الجيزة منع سير الأسكوتر في شوارع المحافظة مشيرا إلى أنه قرار سليم يجب تعميمه في كافة المحافظات.
وقال أمين خلال برنامج "أخر النهار" المذاع على قناة "النهار": "محافظة الجيزة أخذت قرار بحظر أو بمنع السكوتر الكهربائي من السير في شوارع الجيزة إيه هو السكوتر الكهربائي؟ هو الحاجة اللي عاملة زي العجلة بس هي مش عجلة، هي بتمشي بالكهرباء، ومعظم الأطفال والشباب بيشتروها دلوقتي وبيستخدموها كوسيلة مواصلات".
وأضاف: "في النهاية حاجة شبه الفكرة دي، حاجة تقف عليها أو تقعد عليها، وبتمشي بالكهرباء، ولها شحن، البطارية قصير، وبتمشي حوالي سرعتها القصوى بتبقى 50–60 كيلو، حاجة كده يعني المشكلة فين بقي؟ ليه محافظة الجيزة خدت القرار؟ وأنا مع هذا القرار جدًا جدًا لأن السكوتر ده الأصل فيه فكرته قامت على إنه لعبة".
وتابع: "أما إنه قد تحول إلى وسيلة مواصلات، وعند فئات... ما هو خدوا بالكم، السكوتر ده ما بيترخصش ما بيترخصش، يعني لو مشيت وحد وقفك، ما يقولك فين الرخصة؟ تقول له ده ما بيترخصش، وفعلًا عنده حاجة ما بترخصش فبالتالي بقي شباب كتير وأطفال كتير بقت ليل نهار سارحة بيه في الشوارع، وماشية ورايحة جاية وسط العربيات، والأتوبيسات، وعربيات النقل، في منتهى الخطورة"
وواصل: "القصة إنه صح جدًا إن محافظة الجيزة خدت هذا القرار بحظر السكوتر الكهربائي عايز تلعب بيه في البيت العب، عايز تلعب بيه في النادي العب، عايز تسافر في الساحل جوه الكمباوند أو جوه القرية السياحية ماشي لكن تطلع بيه في الشوارع العامة؟ محظور ومش محظور عشان حاجة، محظور عشان حياتك وصحتك وسلامتك".
وأوضح: "أنا مع القرار أنا سؤالي بقي هنا، الملاحظة اللي أنا قلت لكم عايز أقولها في الأول اشمعنى محافظة الجيزة بس؟ يعني إحنا متفقين على إنه خطر ومتفقين على إنه بما إنه مالوش رخصة ومش هيتبع السلامة والأمان وبتاع، يبقى جوه المجتمعات المغلقة، زي النادي أو الكمباوند، ما يطلعش في الشوارع".
وأكمل: "هل بقى محافظة الجيزة هي اللي خايفة على أولادها بس؟ محافظة القاهرة مش خايفة؟ محافظة الإسكندرية مش خايفة؟ محافظة البحيرة مش خايفة؟ محافظة مش عارف كذا؟".
واختتم: "أنا هنا بناشد، أعتقد الدكتورة منال عوض، هي اللي هتبقى مسؤولة عن الحكاية دي، وزيرة التنمية المحلية، المسؤولة عن التنمية المحلية، ومسؤولة عن المحافظين والمحافظات".
