يا ترى إيه هي سفن التغييز اللي أعلنت وزارة البترول عن تشغيلها قريب، هل فعلا هتكون وسيلة بديلة لاستيراد الغاز، وهل هتحل أزمة الطاقة في مصر؟
في وقت بتعاني فيه دول كتير من أزمات في الطاقة، مصر بتحرك بسرعة وبخطوات محسوبة علشان تأمن احتياجاتها وتتفادى اي انقطاع أو نقص في الكهربا او مصادر الطاقة، وده بيكون من خلال سفن التغييز اللي بقت عنصر أساسي في منظومة الغاز الطبيعي.
طيب إيه هي سفن التغييز دي، وإزاي بتساعد في حل أزمة الكهرباء والوقود؟
بص يا سيدي، المهندس كريم بدوي، وزير البترول، نزل بنفسه يتفقد سفينتين تغييز في ميناء سوميد في العين السخنة، واللي هي باسماءو "هوج جاليون" و"إنرجوس إسكيمو"، والسفينتين دول مش عاديين، دي سفن عملاقة بتستقبل الغاز الطبيعي وهو في حالته المسالة، وبتحوله لحالته الغازية، وبعد كده بيروح يتضخ على طول في الشبكة القومية للكهرباء.
يعني ببساطة، السفينتين دول عبارة عن مصانع عاقمة بتحول الغاز المسال لغاز جاهز للاستخدام، سواء لتوليد الكهرباء أو لتلبية احتياجات البيوت والمصانع.
والسفن دي مهمة جدا دلوقتي، خاصة مع ارتفاع الأحمال الصيفية، واحتياج محطات الكهرباء للغاز بشكل مستم، عشان كده في تنسيق يومي بين وزارة البترول وكمان وزارة الكهرباء، عشان الشبكة تفضل مستقرة ومايحصلش أي انقطاع.
ووزير البترول خلال جولته وجه شكر كبير لفرق العمل اللي على السفينتين من مهندسين وفنيين، وقال إن الروح التعاونية والتكاملية اللي بيشتغلوا بيها هي سر النجاح في المنظومة دي.
والموضوع مش بس تقني، لأ كمان اقتصادي، لان وجود سفن التغييز بيخلي عندنا مرونة في استيراد الغاز من أي مكان في العالم وفي أي وقت، من غير ما نكون مرتبطين بخط أنابيب معي، وده بيخلينا نتحرك بسرعة ونشتري الغاز بأفضل سعر في الوقت المناسب.
غير كده، سفن التغييز دي بتقوي موقف مصر كمركز إقليمي للطاقة، لإنك لما يكون عندك القدرة على استيراد وتصدير الغاز، ومعاك بنية تحتية زي السفن ذي، ساعتها بتكون لاعب أساسي في سوق الطاقة العالمي.
وكمان، كل ده بيساعد في حل الأزمات الداخلية، سواء في الكهرباء أو الصناعة أو حتى في توفير العملة الصعبة، لإنك بتقلل الضغط على السوق المحلي.
والخلاصة، هي إن سفن التغييز مش بس سفن، دي سفن إنقاذ للطاقة في مصر، وبتلعب دور كبير في تأمين احتياجاتنا اليومية، وبتخلي عندنا مرونة في وقت صعب على العالم كله.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
