يا ترى إيه اللي مخلي الحكومة مركزة الأيام دي على الصناعة، وإزاي الفريق كامل الوزير بيشتغل عشان يخلي القطاع ده يوصّل لمساهمة 20% في الناتج القومي؟
في الحقيقة، الحكومة دلوقتي ماشية بخطة سريعة جدا عشان ترجع الصناعة تبقى هي المحرك الرئيسي للاقتصاد، مش بس عشان الإنتاج لكن كمان عشان التصدير والتوظيف والدخل القومي.
ومن هنا، كامل الوزير اللي مسئول دلوقتي عن الصناعة، عمل جولة كبيرة في مدينة 6 أكتوبر، ولف على 3 مصانع مهمين جدا، زي مصنع "أولميد ميدل إيست"، وده متخصص في المستلزمات الطبية، وبيصنع حاجات زي فلاتر غسيل الكلى، والمحاليل وكبسولات وأنابيب الدم، وبيشتغل فيه 1500 عامل، وبيصدر لأكتر من 40 دولة، يعني بنتكلم عن صناعة طبية بتنافس بره وتوفر فرص شغل هنا.
والأهم، انهم ضخوا استثمارات جديدة ب 16 مليون يورو عشان يزودوا الإنتاج 30%، وده في عز الأزمة الاقتصادية.
بعد كده، الوزير راح مصنع تاني، وهو "مارس إيجيبت"، بتاع الشوكولاتة، والمصنع ده بيصدر 90% من إنتاجه ل 30 دولة، وبيشغل 450 موظف، وبيستخدم روبوتات وتكنولوجيا حديثة في التصنيع.
ونقدر نقول، إن مصر مش بس بتنتج، دي كمان بتصدر بجودة عالية وبتنافس في السوق العالمي، وده جزء من هدف الدولة وهو اننا نخلي الصناعة مصدر دخل كبير مش بس للاستهلاك المحلي.
وآخر محطة كانت في مصنع "الثلاثية"، وده مصنع بيصنع عربيات هندسية، زي اللي بتنضف الشوارع، وتشفط السيول، وبيصدر كمان جزء من إنتاجه للخارج، وبيشتغل فيه 100 عامل، وبيستخدم أحدث ماكينات التقطيع واللحام والتجميع.
ومن هنا، كامغ الوزير قال اننا بنشتغل على خطة هدفها نخلي مساهمة الصناعة في الناتج القومي توصل ل 20% بدل 14% حاليا، وكمان نضاعف فرص الشغل ل 7 مليون فرصة قبل سنة 2030.
ونقدر نقول، ان الخطة دي مش مجرد كلام، ذي فيها 7 محاور مهمة، وهي تعميق التصنيع المحلي وتوسيع المصانع وتحديثها ودعم التصدير، وكمان تصنيع احتياجات السوق بدل ما نستوردها وزيادة الصناعات الخضراء لحد ما توصل لـ5% من الإنتاج.
يعني باختصار، الدولة دلوقتي بتراهن على الصناعة بشكل فعلي، والمصانع اللي اتفقدها الوزير هي نموذج بيقول إن في استثمارات جاية، إنتاج بيتطور، وشغل بيتخلق.
والخلاصة هي إن الصناعة ممكن ترجع مصر لمكانة قوية اقتصاديا، بس محتاجة استمرارية في التطوير، وتحفيز أكبر للمصنعين، والأهم نشتغل على تدريب العمال وتشجيع التصنيع المحلي بدل الاستيراد.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
