مصر رسمت خطة التخلص من الديون، وكمان هنحول الديون دي لاستثمارات جديدة في الاقتصاد المصري، ياتري ازاي الحكومة هتتخلص من الديون .. وازاي هتحولها لاستثمارات جديدة في الاقتصاد المصري.
في الفترات الأخيرة الاقتصاد المصري حقق طفرات كبيرة جدا وده بشهادة اغلب المنظمات الدولية العالمية واللي كلهم اشادة بالخطوات اللي اخذتها مصر لتحسين وضع الاقتصاد المصري وضغ استثمارات جديدة وزيادة الإنتاج المحلي، وكمان فتح الباب قدام الاستثمارات ورؤوس الأموال الأجنبية للدخول للسوق المصري والتوسع في انشاء وبناء المصانع والشركات.
علي الرغم من التطور الكبير اللي حصل في الاقتصاد القومي ولكن المواطن حتي الان محسش بالشغل الكبير اللي عملته الحكومة ده لسبب بسيط جدا وهو أن الديون الخارجية بتاخذ نسبة كبيرة من الناتج القومي، وبالبلدي دي اللي جاي مش قد اللي رايح، وعلشان المواطن المصري يحس بالانجازات الكبيرة اللي حققتها الحكومة يبقي لازم نتخلص من ديونا الخارجية.
طيب ازاي الحكومة هتتخلص من ديونها الخارجية وتحولها لاستثمارات؟.
مؤخرا مصر نجحت في مبادلة نسبة كبيرة من ديونا الخارجية مع دول إيطاليا والصين ، وكمان حولت الديون دي لاستثمارات مهمة جدا في الاقتصاد المصري، ووصل حجم الديون الخارجية اللي مصر حولتها لاستثمارات في الاقتصاد المصري لـ900 مليون دولار وفقا للكلام اللي اكده الدكتور مصطفي مدبولي رئيس مجلس الوزراء في مؤتمر الأمم المتحدة الرابع للتنمية واللي منعقد في مدينة إشبلية الإسبانية.
الحلول المبتكرة اللي عدد كبير من دول العالم طبقه منهم مصر لمبادلة الديون الخارجية باستثمارات في الاقتصاد المصري هدفها تقليل الضغوط المالية علي الناتج القومي وتحقيق التنمية، ومبادلة الديون عبارة عن عملية الحكومات بتتفاوض فيها مع الدول أو المؤسسات الدائنة لإعادة هيكلة الدين الخارجي، وتحويل جزء منه إلى استثمارات داخلية أو مشاريع تنموية كحل بديل من سداده نقدا.
التفاوض اللي بتقوم بيه الحكومات مع الدول والمؤسسات الدائنة بيقوم علي عرض القطاعات والمشروعات اللي ممكن تدخل فيها الدول أو المؤسسات الدائنة بمعني أنهم يدخلوا ياخذوا مشروعات أو قطع أراضي لاقامة مشروعات جديدة مقابل إسقاط جزء من الديون الخارجية، وده من خلال شروط ميسرة وآليات دبلوماسية ومالية وبتسعى من خلالها الدولة للحصول على فترات سداد أطول وفوائد أقل.
في الفترة اللي فاتت الحكومة ف دخلت في مناقشات مع الدول اللي لها ديون في مصر لتحويل الديون بتاعتهم لاستثمارات مباشرة في السوق المصري، والحكومة شكلت لجنة وزارية عليا هتكون مهمتها التفاوض مع الدول والتحالفات البنكية اللي لها ديون عندنا لمبادلة الديون المستحقة لهم بحصص ملكية في بعض الشركات المملوكة للدولة بالأسعار العادلة، مصر في الوقت الحالي بتستهدف مبادلة 38% من ديونها الخارجية لاستثمارات مباشرة في السوق المصري.
مصر في الفترة اللي فاتت نجحت في التفاوض مع عدد من الدول الدائنه لمصر، وكانت البداية بالصين اللي وافقت تحول ديونها للاستثمارات مباشرة ونجحنا في تحويل أكثر من 120 مليون دولار ديون للصين لاستثمارات في مشروعات تنموية خضراء.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
