رغم التوترات السياسية وتصاعد الحرب بين إيران وإسرائيل، مصر داخلة على خطوة جديدة وهي تشغيل أكبر اكتشافات الغاز في البحر المتوسط، وده هيخلي مصر تصدر الغاز الطبيعي وتدخل عملة صعبة، بس هل ده هيساعد على تخفيض تكلفة توليد الكهربا ويوفر مليارات، وإزاي مشروع الغاز الجديد هيدخل استثمارات أجنبية لمصر..
إيه اللي حصل النهاردة في وزارة البترول، واللي قررت تزف بشرى سارة للمصريين في الوقت ده .. شوف ياسيدي الوزارة دلوقتي بتستعد ا لبدء تشغيل بئر "ظهر 6" خلال شهر يونيو اللي احنا فيه ده، ودي بتعتبر خطوة جديدة وجت في وقتها لتعزيز الإنتاج المحلي من الغاز الطبيعي، والمفاجأة كمان أنه هيكون بإنتاج يومي يتراوح بين 40 إلى 50 مليون قدم مكعب من الغاز.
مش بس كده، ده الشغل في البير الجديدة بدأ خلاص تحت قيادة شركة "إيني" الإيطالية" بالتعاون مع شركة "بتروبل" والهيئة المصرية العامة للبترول، وده عشان نقدر نواكب الطلب اللي هيكون كبير جدا خاصة من قطاعات الكهرباء والصناعة اللي بيشهدوا ضغط كبير مع دخول الصيف..
بس هل التحدي ده بسيط؟.. طبعا لا، كل مشروع جديد أو مشروع ضخم بيحتاج تكاتف كل قطاعات الدولة عشان نقدر نوصل للنجاح الكبير، وده باين جدا من الفرق الفنية اللي بتنفذ حاليا عمليات دقيقة جدًا لعزل طبقات المياه المتسببة في التسرب داخل البئر باستخدام تقنيات متطورة ومواد كيميائية خاصة لضمان إن الغاز يفضل نقي وبدون شوائب تؤثر على كفاءة الضخ والإنتاج.
واللي ميعرفش... بئر "ظهر 6"، هو جزء من حقل "ظهر" العملاق اللي بيعتبر من أكبر اكتشافات الغاز في البحر المتوسط وركيزة أساسية في خطة مصر للتحول إلى مركز إقليمي للطاقة، مش بس وكده، ده الحفل ساهم خلال السنين اللي فاتت في تقليل استيراد الغاز وتحقيق فائض كبير للتصدير.
بس هل ده هيعود بفايدة على الناس؟، بئر "ظهر 6" مش بس هيزود الدخل القومي لمصر ويدخل عملة صعبة تدعم ميزان المدفوعات، ده كمان هيقلل استيرادنا للوقود من الخارج، ده غير أنه هيخفض تكلفة توليد الكهربا لأننا بنعتمد على الغاز في تشغيل أغلب محطات الكهربا.. ، كمان هيحسن من مستوى المعيشة للمصريين، لأنه هيوفر الغاز للمنازل والمصانع بأسعار مناسبة وبكده يكون بيدعم الاستقرار الاجتماعي، لأن توصيل الغاز الطبيعي للمنازل والمصانع بيحسن من جودة الخدمات المقدمة للناس ويقلل اعتمادهم على البوتجاز اللي سعره عالي وبيرهق الأسر.
مش بس كده، ده بير الغاز الجديد هيكون سبب كبير في جذب الاستثمارات الأجنبية، لأن شركات الطاقة العالمية هتتعاون مع مصر في أعمال الحفر والتطوير وده هيضخ استثمارات جديدة في السوق، ده غير أنها هتخلق آلاف من فرص العمل المباشرة وغير المباشرة واللي منها أنشطة التنقيب والحفر والتكرير.
الرسالة واضحة.. مصر مستمرة في تعظيم مواردها الطبيعية وتأمين احتياجاتها من الطاقة رغم التحديات الفنية والضغوط المتزايدة، وده عشان تقدر توفر حياة كريمة لكل المصريين، وكمان عشان مفيش دولة تقدر تتحكم فينا في قصة استيراد الغاز الطبيعي.
طيب ليه الاكتشاف دا جاي في وقته؟
عشان ببساطة مصر عليها ضغوط اقتصادية كبيرة بعد الأحداث اللي اشتعلت في المنطقة في الأيام الأخيرة واللي رفع أسعار المواد البترولية عالميا وضغط على الدولار في مصر وزود فاتورة الاستيراد والاكتشاف دا هيعزز الإنتاج المحلي للغاز ويوفر مليارات الدولارات اللي بنستورد بيها وفي نفس الوقت هيعزز معدلات النمو الاقتصادي ويقلل التضخم.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
