في حاجة كبيرة بتحصل في الاقتصاد العالمي اليومين دول، والخبرا بيقولوا إننا داخلين على أضعف نمو اقتصادي من 60 سنة، ختى البنك الدولي بنفسه طلع وقال الكلام ده، طب يا ترى الايام الجاية هيحصل فيها إيه؟
في الحقيقة، في تقرير جديد صدر من البنك الدولي قريب، وكشف عن خفض توقعات النمو العالمي لسنة 2025، وأكد إننا ممكن نشوف نسبة نمو 2.3% بس، وده أقل من التوقعات اللي كانت في بداية السنة دي.
وده مش رأي البنك الدولي لوحده، ده حتى كمان صندوق النقد الدولي ومنظمة التعاون الاقتصادي خفضوا هما كمان التوقعات، وده معناه إن التباطؤ بقى واضح للجميع، والناس بدأت تقلق على الاقتصاد العالمي.
ولكن نقدر نقول، إن الموضوع مش بسيط، لأن في خبير اقتصادي كبير في البنك الدولي، اسمه إندرميت جيل، قال إننا بنشهد أضعف أداء للاقتصاد العالمي من جوابي 17 سنة، ولو استثنينا فترات الركود، يبقى ده أضعف نمو اقتصادي شوفناه من الستينات.
طب ليه؟ إيه اللي حصل؟
السبب الرئيسي هو الحرب التجارية اللي لسه شغالة بين أمريكا والصين، خاصة وإن الرسوم الجمركية اللي فرضها ترامب، لسه ليها تأثير سلبي لحد دلوقتي، والتوتر بين واشنطن وبكين بيزود القلق وبيخلي حركة التجارة العالمية تبقى بطيئة شويتين، وده رغم اتفاق الدولتين في لندن على تهدئة الأوضاع.
عندك كمام، في حالة عدم يقين سياسي كبيرة، والانقسام اللي حاصل في سلاسل التوريد، وكل ده مأثر على حركة الاستثمارات والتبادل التجاري، ومن هنا قال البنك الدولي كمان إنه رغم إننا مش في ركود دلوقتي، لكن لو استمرت التوقعات دي للسنتين الجايين، يبقى العقد ده ممكن يكون الأسوأ من 60 سنة.
وحاليا، العالم كله في وضع ترقب، ومستني يشوف هل الحكومات هتقدر تتدخل وتعدل المسار، ولا هنكمل على نفس المنحدر، خاصة وإن الاقتصاد الضعيف معناه مشاكل في التوظيف وتباطؤ في الاستثمار، وتأثير مباشر على معيشة الناس، من أول أمريكا والصين، لحد البلاد النامية حتى عندنا في مصر.
ولو فعليا، خصل أي تراجع في الاقتصاد العالمي، فممكن ينعكس علينا بشكل مباشر على كل حاجة، يعني مثلا الاستثمارات تقل والإجراءات هتتأثر بشكل سلبي وكمان الأسعار هترتفع بشكل كبير، ولمواطن البسيط هو اللي بيتحمل النتيجة في النهاية، عشان كده الدول القوية اقتصاديا واللي منها أمريكا والصين لازن تعيد التفكير في سياساتها الاقتصادية لأن اي قرار لها بيأتر على العالم كله.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
