ايه حكاية المشروعات اللي اتكلم فيها الرئيس السيسي النهاردة.. وازاي مصر هتتنقل نقلة كبيرة في مشروعات الزراعة والثروة الحيوانية والسمكية.. وايه حكاية ملايين قرص العمل الجديدة.. وايه تأثير المشروعات دي على أسعار المحاصيل والمنتجات الزراعية.
زي ما تابعنا على الهواء مباشره النهاردة الرئيس السيسي كان بيفتتح موسم حصاد القمح بمشروع مستقبل مصر للإنتاج الزراعي العملاق وطبعا الرئيس استغل المناسبة المهمة دي وفجر مفاجآت من العيار التقيل أولها إن مشروع الدلتا الجديدة هيضيف 2 مليون فدان للرقعة الزراعية وهيساهم في خلق ملايين فرص العمل.. وقال الرئيس كمان إن تكلفة تنفيذ الميكنة الزراعية في مشروع الدلتا هيحتاج إلى استثمارات ضخمة،تقدر بعشرات المليارات لتحقيق أقصى استفادة من المياه المتاحة.
الرئيس كشف كمان إن المنطقة هتستوعب حوالي 2 مليون أسرة في تخطيط عمراني متكامل يجمع بين الزراعة والصناعة، ويوفر فرص عمل واسعة النطاق وهيعزز الأمن الغذائي للمصريين.. مش بس كده الرئيس السيسي كشف كمان إن فيه 800 ألف فدان جديد هتضاف للرقعة الزراعية في يوليو الجاي ودا غير مشروعات الاستصلاح الزراعي التانية اللي الدولة شغالة عليها وبتسابق الزمن .
طبعا الأرقام والتفاصيل اللي قالها الرئيس السيسي النهاردة بتقول إنه متابع أدق التفاصيل في المشروعات الضخمة دي وإنه عارف كل مليم بيتصرف فين وكشف إن مصر على أعتاب نهضة زراعية كبيرة هتعزز الأمن القومي المصري لأن تأمين الغذاء لايقل عن تأمين الحدود ولو فاكرين لما الرئيس قال اللي مايملكش لقمته ما يملكش قراره وكان ساعتها يقصد أن مصر لازم تكون دولة قوية وقادرة على تصنيع منتجاتها وزراعة أكلها عشان متبقاش تحت ضغط من اي حد ..
الزراعة أهم مشروع في برامج الدولة حاليا لأنها بتعتمد عليها قطاعات اقتصاديه تانية زي الصناعة والثروى الحيوانية وصناعة الألبان ودا كله مهم جدا في قايمة طعام المصريين وتوفيرها بكميات كبيرة معناها تعزيز الأمن القومي زي ما قلنا من ناحية ومن الناحية التانية السيطرة على زيادة الأسعار في الأسواق.
اللي بيتعمل في قطاع الزراعة والقطاعات المرتبطة بيها مش بس مجرد مشروعات دا ليلة كبيرة جدا هتغير مسار الاقتصاد المصري كله في الفترة الجاية وهترفع معدلات التصدير وتعزز استثمارات التصنيع الزراعي وخاصة مع دخول القطاع الخاص بقوة للمجال الحيوي دا وهي دي النقطة المهمة اللي اتكلم فيها الرئيس النهاردة وهي إن القطاع الخاص لازم يقود التمنية الزراعية والحيوانية في مصر وتطوير أساليب الزراعة والثروة السمكية والحيوانية بإدخال تكنولوجيا حديثة توفر في الوقت والجهد وتزود الإنتاج.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
