بيمشي على الأرض وبيعوم في المياه.. تخيل تبقى واقف على الكورنيش وتلاقي أتوبيس ماشي الأرض عادي قدامك وفجأة يقوم نازل مكمل رحلته في النيل عوم.. وكأن مافيش حاجة حصلت.
وده مش تخيل ولا حاجة.. ده اللي هيحصل فعلاً في القاهرة الشهر الجاي لما يوصل أول أتوبيس برمائي من مالطا بعد ما الجهات المصرية والمالطية خلصوا كل إجراءات الشحن والتنسيق والتجهيزات.
الأتوبيس ده مش زي أي أتوبيس شوفته قبل كده ماشي في الشارع وعادي يدخل الميه يكمل رحلته بكل أمان وسلاسة تجربة جديدة بتدشنها وزارة النقل بالتعاون مع هيئة النقل النهري ووزارة السياحة ودي أول مرة مصر تجرب النوع ده من وسائل النقل اللي بتخدم السياحة بشكل أساسي.
المخطط إن الأتوبيس يوصل الشهر الجاي ويتم تشغيله كتجربة أولى داخل نطاق القاهرة الكبرى وبعدها يتم تقييمه من المتخصصين ولو التجربة نجحت هتبدأ تتكرر وتتعمم في مدن تانية زي الأقصر وأسوان علشان تبقى وسيلة حضارية بتخدم السائح والمواطن وبتغير شكل النقل في مصر.
رئيس هيئة النقل النهري اللواء صلاح مفيد قال إن الأتوبيس البرمائي هيشتغل قبل نهاية السنة دي وهيوفر تجربة سياحية مختلفة مفيش زيها في الشرق الأوسط لا في الشكل ولا في التقنية ولا في الأمان ده جزء من خطة كبيرة لتطوير منظومة النقل النهري بالكامل وتحويلها لنقل أخضر صديق للبيئة ومتوافق مع المعايير العالمية.
والوزارة مش وقفت هنا لأ دي كمان بدأت خطة لرفع كفاءة ٢٦ أتوبيس نهري موجودين فعلاً منهم ١٧ في القاهرة الكبرى و٩ في باقي المحافظات وده من عوائد التشغيل نفسه وكمان بيتم تطوير ٤٠٨ مرسى بنموذج موحد ومتطور على أعلى مستويات الأمان والسلامة.
وعلشان الناس تبقى عارفة إن الشغل ماشي بخطة واضحة وزارة النقل أعلنت إن في ٢٠٣٠ هيكون عندنا ٥٢٠ وحدة نقل نهري بينقلوا ١٠ مليون طن بضايع و٢١ مليون راكب سنويًا على مسافة ١٨٥٥ كيلو متر طرق ملاحية فيها ١١ هويس و٥٣ ميناء نهري وكل ده مربوط ببنية معلوماتية ذكية بتغطي النيل بالكامل.
يعني من الآخر مش بنتكلم عن أتوبيس وبس إحنا بنتكلم عن نقلة نوعية في شكل النقل السياحي والنقل النهري في مصر بنية تحتية جديدة مرسى بشكل حضاري أمان أعلى خدمة أرقى ورؤية بتقول إن مصر مش بس بتحلم لا دي بتنفذ كمان.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
