هو إحنا ممكن نوصل لاكتفاء ذاتي من الغاز الطبيعي؟ أو ممكن حتى نرجع تاني نبقى مركز إقليمي للطاقة في المنطقة؟ طيب إيه رأيكم إن فيه صفقات جديدة بتتحضر في السر وممكن تضاعف إنتاجنا من الغاز لدرجة مش متوقعة؟
الشركة المصرية القابضة للغازات الطبيعية "إيجاس" بتجهز خطة ضخمة للاستكشافات البترولية.. الخطة ببساطة بتتضمن طرح 5 مناطق جديدة للاستكشاف في البحر المتوسط.
طب ليه البحر المتوسط بالتحديد؟
البحر المتوسط هو كنز مصر الحقيقي.. كل يوم بنسمع عن اكتشاف جديد.. وكل يوم بيثبت إنه فيه ثروات ضخمة لسه مدفونة تحت الميه.. و"إيجاس" مش بتشتغل بشكل عشوائي لا... فيه شغل كبير بيتعمل من ورا الكواليس.
الشركة خلصت مسح سيزمي لأكثر من 9 مناطق.. وده ببساطة زي ما يكونوا بيعملوا "أشعة" تحت الأرض عشان يعرفوا بالظبط فين أماكن الغاز والبترول.
طيب إيه الفايدة من المسح ده؟
الفايدة إنه بيشجع الشركات الأجنبية الضخمة إنها تيجي تستثمر عندنا.. ليه؟ لأن المسح ده بيديهم صورة واضحة ومبدئية عن حجم الثروة اللي موجودة فبيكونوا متأكدين إن فلوسهم مش هتضيع بالعكس... هيعملوا استثمارات ضخمة.
تخيلوا إن وزارة البترول المصرية بتستهدف حفر من 10 لـ 12 بئر استكشافية جديدة.. وده هيجذب استثمارات تتجاوز 350 مليون دولار في المرحلة الأولى بس.. والمبلغ ده مش قليل خصوصًا إن المتوقع منه إنه يزود إنتاجنا من الغاز بـ850 مليون قدم مكعب في اليوم.. الكمية دي لوحدها كفيلة إنها تحل جزء كبير من أزمة الطاقة اللي بنعاني منها.
والحكومة المصرية عارفة إن الشركات الأجنبية دي محتاجة حوافز عشان تيجي وتشتغل. عشان كده، فيه قرار مهم جدًا.. الحكومة هتبدأ تسدد جزء من مستحقات الشركات الأجنبية خلال الربع الأخير من 2025.. الخطوة دي هتدي ثقة كبيرة للشركات دي، وهتشجعها إنها تشارك في طرح المناطق الجديدة، وتقدم عروض فنية ومالية قوية.
شركة "إيجاس" نفسها كشفت في سبتمبر اللي فات عن تحقيق 29 اكتشافًا جديدًا للغاز الطبيعي، في أماكن مختلفة زي البحر المتوسط والصحراء الغربية وخليج السويس.
الاكتشافات دي ضافت حوالي 1.85 تريليون قدم مكعب لاحتياطي الغاز بتاعنا.. الهدف الأساسي للحكومة واضح نزود الإنتاج المحلي من الغاز الطبيعي عشان نوصل لأكبر اكتفاء ذاتي ممكن.
والخطة بتستهدف نوصل لحجم إنتاج يومي بيقارب 6.6 مليار قدم مكعب خلال عام 2027.. لو الخطة دي نجحت مصر هترجع تاني بقوة على الخريطة العالمية للطاقة وهيبقى عندها قدرة كبيرة إنها تصدر الغاز لكل دول العالم.. يا ترى هنشوف أسماء شركات عالمية عملاقة بتتسابق عشان تاخد جزء من الكنز ده.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
