في وقت الناس بتتكلم عن الأزمات.. في ناس بتخطط للمكاسب.. السعودية أعلنت إنها داخلة السوق المصري بـمليارات. مش كلام في الهوا، ولا نوايا مستقبلية، ده خطة واضحة وأرقام رسمية: 26 مليار جنيه خلال خمس سنين، وصندوق عقاري هو الأكبر من نوعه في مصر في الطريق.
النهاردة هنسأل: هل الاستثمارات دي هتغير شكل السوق العقاري في مصر؟.. وإيه اللي يخلي السعودية تراهن علينا بالشكل ده دلوقتي؟.
شركة "سمو للاستثمار" السعودية أعلنت رسميًا إنها ناوية تضخ حوالي ملياري ريال سعودي في مصر يعني قرابة 26 مليار جنيه مصري خلال 5 سنين بس. الفلوس دي رايحة لفين؟ للتطوير العقاري.. بس مش أي تطوير، ده تطوير متكامل متعدد الاستخدامات.
يعني إيه؟
يعني مشاريع فيها سكني وفندقي وإداري وتجاري في مكان واحد.
ليه الاستثمار ده مهم؟
أولًا، دي استثمارات جديدة مالهاش علاقة لا بالمشاريع القديمة ولا باتفاقية الـ70 مليار جنيه مع "ميدار" اللي تم توقيعها قبل كده.
ثانيًا، الشركة هتدخل بنظام الشراكة مع مطورين مصريين، وده معناه تشغيل للسوق المحلي، فرص عمل، وتكامل مع الشركات الوطنية.
ثالثًا، المستثمرين مش جايين يبيعوا وحدات وبس لا، فيه حلول جديدة للمشترين: "اشتر شقة، وشغلها أو أجّرها لصالحك بعقد رسمي من شركة متخصصة في الإدارة والتشغيل".. ودي نقلة كبيرة في فكر السوق المصري.
أكبر صندوق عقاري سعودي في مصر
أحمد الهاشمي، الرئيس التنفيذي لتطوير الأعمال في "سمو"، قال إنهم هيطلقوا أكبر صندوق عقاري سعودي في مصر خلال 6 شهور بالشراكة مع شركة "ميدار" المصرية.
التجهيز للصندوق ده بيتابع أسبوعيًا مع مجلس الوزراء المصري، وبدعم رسمي مباشر وده بيبعث رسالة طمأنينة لأي مستثمر تاني.
حجم الفلوس دي قد إيه؟
"سمو" بتدير صناديق عقارية في السعودية بحجم يتجاوز 28 مليار ريال، وفيه خطط لتوسيعها لـ 80 مليار ريال خلال 5 سنين. من الرقم ده، حوالي 5% رايحين لمصر وده معناه إن السوق المصري واخد أولوية واضحة، خاصة مع وجود دعم سياسي من الطرفين.
مش لوحدهم.
صندوق الاستثمارات العامة السعودي، اللي هو الذراع المالية الأضخم في السعودية، كمان شغّال على ضخ استثمارات مباشرة في مصر. ده غير اتفاقيات الحماية اللي تم توقيعها في أكتوبر 2024 بين مصر والسعودية لتأمين الاستثمار وضمان عدم تأثره بأي ظروف. وفي زيارة ولي العهد محمد بن سلمان، تم الإعلان عن ضخ 5 مليار دولار كمرحلة أولى من استثمارات الصندوق في مصر.
إحنا قدام لحظة فارقة: تدفقات مالية ضخمة جاية من الخليج، اهتمام دولي بالسوق العقاري المصري، دعم حكومي مباشر، وأفكار استثمارية حديثة مش بس بيع شقق.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
