أسعار الذهب رجعت تخالف التوقعات وبدأت تنخفض من جديد بعد ما حققت مكاسب تاريخية.
ياترى إيه سر الانخفاضات الأخيرة؟.. وهل الأسعار مكملة في النزول؟ ولا في فرصة ترجع ترتفع تاني؟
من بداية 2025، أسعار الذهب بقت حديث الناس كلها.
يوم في الطالع.. ويوم في النازل.. ومحدش قادر يفهم إيه اللي بيخلي الأسعار تتحرك بالشكل الكبير ده.
خصوصًا إن في مصر أسعار الصرف مستقرة من فترة طويلة، ومفيش أي أسباب داخلية تخلي الذهب يرتفع قوي.
يعني المفروض الأسعار تبقى مرشحة للانخفاض مش العكس.
لكن الحقيقة مختلفة.. خلينا نفهم ليه.
أول حاجة لازم نعرفها: أسعار الذهب في مصر مرتبطة بشكل مباشر بالسعر العالمي.
واللي حصل الفترة اللي فاتت إن سعر الأونصة عالميًا سجل قفزة تاريخية وتعدى 3700 دولار لأول مرة.
طيب إيه اللي خلّى الذهب يطير كده؟
فيه كذا سبب رئيسي:
1. التوترات السياسية والاقتصادية بين الدول، التوترات دي عملت حالة خوف عالمي وتهديد للاقتصاديات، النتيجة: مستثمرين كتير هربوا من البورصات للذهب باعتباره "الملاذ الآمن".
2. سياسات البنوك المركزية العالمية: عدد كبير من البنوك المركزية بدأ يحول احتياطيات نقدية كبيرة إلى ذهب، السبب: الذهب بيحتفظ بقيمته وما بيتأثرش بنفس الضغوط اللي بتأثر على العملات.
3. قرارات الفائدة الأمريكية: آخرها قرار البنك الفيدرالي الأمريكي بخفض أسعار الفائدة 25 نقطة أساس لأول مرة في 2025، دلوقتي الفائدة هناك في نطاق بين 4% و4.25%، وفي توقعات إن الفيدرالي يكمّل بخفض الفائدة في اجتماعاته الجاية.
أي خفض في الفائدة الأمريكية بيأثر مباشرة على قوة الدولار، ولأن العلاقة بين الذهب والدولار عكسية: كل ما الدولار ينزل الذهب يرتفع، وكل ما الدولار يقوى الذهب ينخفض.
وعشان كده، التوقعات بتقول إن أسعار الذهب عالميًا مرشحة لزيادات جديدة بسبب استمرار الضغوط على الدولار.
طب إيه وضع مصر؟
الذهب هنا بيتأثر بالعالم طبعًا، لكن في نفس الوقت في عوامل داخلية: معدلات التضخم - أسعار الفائدة المحلية
الاتنين دول ليهم دور مباشر في تحديد سعر الذهب في السوق المصري.
لكن حتى مع أي هبوط بسيط، كل المؤشرات بتقول إن أسعار الذهب هتفضل مرشحة للزيادة قبل نهاية 2025، بسبب: استمرار التوترات الدولية، وتوقعات خفض أسعار الفائدة الأمريكية.
مستثمري الذهب قدامهم فرصة قوية قبل نهاية 2025.
الذهب ممكن يشهد تذبذبات مؤقتة.. لكن الاتجاه العام مرشح يكون للصعود أكتر من الهبوط.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
