إيه حكاية الـ 873 مليون دولار اللي دخلوا مصر الأسبوع اللي فات؟.. وليه الدولار استقر عند حدود 48 جنيه بعد ما كان بيتأرجح لفترة طويلة؟.. والأهم هل ده معناه إن الأموال الساخنة راجعة تاني بقوة؟
البيانات اللي خرجت من البورصة المصرية بتأكد إن تعاملات العرب والأجانب في السوق الثانوية للديون الحكومية سجلت صافي شراء ضخم – 873.4 مليون دولار في أسبوع واحد بس.
وده مش كل حاجة… كمان تعاملات الأجانب في البورصة سجلت صافي شراء بحوالي 1.1 مليار جنيه.
يعني فيه فلوس داخلة، فيه ثقة راجعة، وفيه حركة إيجابية في السوق.
وفي نفس الوقت، الدولار قدام الجنيه استقر وسجل 48.13 للشراء و48.26 للبيع.
كمان العملة الأمريكية نزلت بنسبة 0.8% من بداية سبتمبر، وده بيقول إن السوق هادي شوية، والضغوط اللي كنا شايفينها قبل كده قلت بشكل ملحوظ.
طيب.. ليه الأموال الساخنة بدأت ترجع تاني لمصر؟
الإجابة في كلمة واحدة: الفايدة،ة الفيدرالي الأمريكي ابتدى خفض الفايدة وبيلمح أنه مستمر في سياسة التيسير النقدي.. ومع انخفاض العائد في أمريكا، المستثمر الأجنبي بيدور على مكان تاني يدي عائد أعلى.
وهنا السوق المصري بيظهر قدامه كفرصة قوية، خصوصًا مع استقرار نسبي في سعر الصرف وعودة الثقة تدريجيًا.
عودة الأموال الساخنة خلت الناس تفتكر درس 2022، وقتها الأموال دي خرجت بسرعة، وسحبت معاها عشرات المليارات، والنتيجة كانت ضغوط كبيرة على الجنيه.
عشان كده دلوقتي الدولة بتتعامل بحذر: تستفيد من رجوع الفلوس دي، لكن من غير ما تعتمد عليها اعتماد كامل، وده اللي أكده رئيس الوزراء الأسبوع اللي فات.
مصطفى مدبولي وضح إن الأموال الساخنة مش محسوبة في الاحتياطي النقدي بتاع البنك المركزي، يعني ببساطة: الفلوس دي موجودة، ومفيدة، والحكوة مش بعتمد عليها.. هي بس بتساعد في اتزان السوق، لكن مش هي اللي بتحدد الأرقام الرسمية.
اللي بيحصل دلوقتي بيأكد إن السوق المصري قادر يجذب استثمارات حتى في الظروف العالمية الصعبة.. واستقرار الجنيه، وعودة الأموال الساخنة، وصافي شراء الأجانب في البورصة… كلها إشارات ثقة في الاقتصاد المصري.
والأهم إننا ماشيين في طريق إصلاح طويل بيخلي مصر مش بس وجهة للأموال الساخنة.. لكن كمان بيئة آمنة للاستثمار الحقيقي.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
