اللي حصل في البورصة الأيام اللي فاتت مش قليل.. 9 شركات، 13 متهم، ورجال أعمال كبار.. كلهم اتصدر ضدهم أحكام جنائية نهائية بتهم التلاعب في البورصة المصرية.
ومش بكلام وخلاص.. بنتكلم عن غرامات وصلت لـ 41 مليون جنيه، وفيه حُكم حبس كمان، مين هي الشركات ورجال الأعمال دول؟ وعملوا إيه؟ ده اللى هنعرفه في التقرير ده.
خلينا نبدأ من أول قضية..
شركة المجموعة المصرية العقارية، والمتهم فيها جمال محمود محجوب، رئيس مجلس الإدارة السابق.
الراجل اتحكم عليه بغرامة مليون جنيه بعد ما أثبتت الهيئة إنه قدّم بيانات غير صحيحة، وخلّى أسهم ليه اوليه صلة بيها تصوت في الجمعيات العمومية من غير ما يتم استبعادها، ده غير إنه أفصح بمعلومات مضللة للبورصة.
والموضوع ما وقفش هنا، آل محجوب نفسهم تورطوا في أكتر من قضية تانية، زي التعامل على سهم الإسماعيلية الجديدة من غير ما يبلغوا الهيئة بعد ما تجاوزوا نسبة 5%، والغرامة كانت 50 ألف جنيه لكل واحد فيهم.
بعدها تِظهر قضية تانية:
رواد للسياحة، اللي اشتروا فيها أسهم كتير كمجموعة مرتبطة، من غير ما يقدموا عرض شراء إجباري لباقي المساهمين، وده خرق واضح للقانون.
النيابة حكمت عليهم بـ 200 ألف جنيه لكل متهم، وكمان يردوا قيمة الأوراق المالية اللي خالفوا بيها القانون.
أما بقى أكبر قضية من حيث الغرامة فكانت ضد محمد الماوي، اللي اتهموه بالتلاعب في سهم "الخليجية الكندية"، عن طريق تعاملات متزامنة بتخلق سعر مصطنع..
الراجل ده اتغرم لوحده أكتر من 35 مليون جنيه!
وتورط كمان في إدارة محافظ استثمارية من غير ترخيص، فزودوا عليه غرامات تانية بـ مليون ونص جنيه.
نيجي بقى للقضية اللي فيها حكم حبس:
محمد أبو زيد، رئيس شركة العقارية للبنوك الوطنية الأسبق، اتهموه بإنه أفشى معلومات داخلية عن الشركة لأخوه قبل ما تتنشر رسمي، علشان يبيع الأسهم ويتفادى الخسارة..
الحكم: سنتين حبس مع الشغل، مع إيقاف التنفيذ بكفالة 20 ألف، وأخوه اتغرّم 500 ألف جنيه.
وفيه كمان قضية تخص نشر أخبار كاذبة على فيسبوك لتضليل المستثمرين.. المتهمين فيها اتغرّموا بمبالغ وصلت لـ 2.5 مليون جنيه.
يعني إيه؟
يعني الدولة بتقول بشكل واضح: مفيش تلاعب هيعدي، ومفيش كبير على القانون.
الرقابة المالية أعلنت إن دي خطوة مهمة لحماية المستثمرين، وتأكيد على إن السوق المصري بيتنظف، واللي هيتلاعب هيدفع التمن.. نقدًا أو حبس
وبالنسبة للمستثمرين، فدي رسالة طمأنينة.. إن الشفافية موجودة، وإن في رقابة حقيقية على السوق، وقراراتكم الاستثمارية لازم تبقى مبنية على معلومات دقيقة مش شائعات ولا مناورات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
