بعد ما مصر وصلت لمستويات قياسية من الموارد الدولارية، يا ترى هنشوف استقرار أكبر في سعر الدولار الفترة الجاية؟.. وهل زيادة الاحتياطي هتخلي مصر قادرة تمول مشروعات تنموية أكبر وتسرع وتيرة الإصلاح الاقتصادي؟.. وهل ده كافي عشان نحمي الجنيه من أي هزات عالمية جديدة؟
حاجة مهمة جدًا يمكن الناس ماخدتش بالها منها في اجتماع الرئيس عبد الفتاح السيسي مع الدكتور مصطفى مدبولي، رئيس الوزراء، ومحافظ البنك المركزي حسن عبدالله، وهي ليه الرئيس السيسي طلب بشكل مباشر زيادة الاحتياطي النقدي لمصر؟، الموضوع مش صدفة ولا قرار عادي، ده قرار استراتيجي مرتبط بالظروف اللي العالم كله عايشها دلوقتي.
احنا قدام واقع اقتصادي عالمي صعب، في حروب وصراعات في المنطقة، أسعار البترول والسلع بتتغير كل يوم، والتجارة العالمية بقت معرضة لهزات مفاجئة، ومصر كدولة كبيرة لازم يكون عندها صمام أمان يحميها وقت الأزمات، الصمام ده هو الاحتياطي النقدي.
الاحتياطي ده ببساطة هو الفلوس اللي الدولة بتخزنها من العملات الأجنبية زي الدولار واليورو والدهب، علشان تستخدمها في وقت الشدة، وعلشان تضمن إنها تقدر تستورد السلع الأساسية اللي الناس محتاجاها زي الأكل والدواء والوقود، مهما حصل حوالينا.
طيب ليه دلوقتي بالذات؟، لأن مع تصاعد الأحداث في المنطقة، ومع كل التوترات الاقتصادية، لازم يكون عندنا قوة تحمي الاقتصاد المصري، والاحتياطي مش بس رصيد في البنك، لأ ده رسالة للعالم كله إن مصر واقفة على رجلها وقادرة تواجه أي أزمة.. كمان الاحتياطي ليه دور أساسي في استقرار سعر الدولار، ولما يبقى عندك رصيد قوي من العملات الأجنبية، السوق بيبقى مطمئن، والمستثمرين كمان بيبقوا حاسين بالأمان إن الدولة عندها قدرة على الوفاء بالتزاماتها، وده بدوره بيشجع الاستثمار وبيزود الثقة في الاقتصاد.
ومن زاوية تانية، الرئيس السيسي بيبص للمستقبل، هو مش عايز يستنى لما تحصل أزمة ونقعد ندور وقتها على حلول، بالعكس هو بيجهز البلد من دلوقتي، يعني زيادة الاحتياطي معناها إنك بتحمي المواطن من ارتفاع الأسعار الجنوني اللي ممكن يحصل لو حصل نقص في الدولار، وكمان بتحمي الدولة من إنها تستدين بشكل مفرط أو تضطر تلجأ لخطوات استثنائية.
الاحتياطي كمان بيدي قوة لمصر في المفاوضات الدولية، لما أي مؤسسة أو دولة تبص على مصر وتلاقي عندنا احتياطي كبير ومستقر، بيبقى فيه احترام وثقة أكبر، وده بيخلي موقفنا أقوى سواء في الاتفاقيات أو حتى في جذب الاستثمارات.
الخلاصة إن الاحتياطي النقدي هو درع واقي لمصر، وقرار زي ده من الرئيس السيسي هو رسالة إن الدولة مستعدة لأي مفاجآت، وإن الشعب المصري محمي في وسط عالم مليان تقلبات.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
