أكد الإعلامي عمرو أديب أن الهند حققت إنجازات اقتصادية كبيرة مشيرا إلى أنها أصبحت احد القوى الكبرى في قارة أسيا.
وقال أديب خلال برنامج "الحكاية" المذاع على قناة "أم بي سي مصر": "من يومين كنا دايمًا نتريق على الهنود، والهند… حاطين مقارنة بين الصين وروسيا والهند تاني، حاطين مقارنة بين مين؟ الصين وروسيا والهند. الأرقام انت مالكش دعوة بيها خالص، خالص، ولا تقربلها يعني أنا ما بتكلمش على أرقام الصين وروسيا، أنا بكلمك على الهند".
وأضاف: "طلع الحاج أبو حنان قال لك: احنا يبدو إن احنا فقدنا الدول دي، احنا مش قدها يعني الناس دي احنا مش قدها خلاص هو التحالف الصيني الروسي الهندي أقوى من أي حاجة سكانًا كانوا عاملين عدد السكان… أهو يبدو إننا فقدنا الهند وروسيا لصالح الصين".
وتابع: "يا جدعان، الدنيا… اتفضل اقرأ اقرأ الأرقام، اقرأ واتسلى بتعريف المجلة اقرأ لازم نبص يا عالم، لازم نبص يا هو الدنيا بتتحرك إزاي؟ بتعمل إيه؟ في لحظة زي دي لازم تشوف الهند عدد السكان مليار نسمة، الناتج المحلي كام؟ 4.18 تريليون دولار! أكتر من الناتج المحلي بتاع روسيا".
وواصل: "الهند… اللي هو يقول لك انت فاكرني هندي؟ مهراجا وريشة؟ وفيلم هندي وغُنى هندي وتريقة هندي؟ احنا كل اللي جابناه من الهند هنا في مصر المانجا الهندي ده الشيء الوحيد اللي احنا يعني بنضارعهم فيه إنما تبص على الأرقام، تبص على الناس رايحة فين، احنا لازم بقي طير انت بقى آن الأوان".
وأوضح: "طب الناس دي عملت إيه؟ هتقول لي إيه؟ احنا عندنا ساعات هنا مثلًا، معلش يعني استحملوني، يقول لك إيه عدد السكان في مصر طب وعدد السكان في الهند أخباره إيه؟ ده انت كام؟ انت 120 مليون بالضيوف هو كام؟ مليار وحاجة يعني قدك قد إيه؟ بياكل ويشرب ويعلّم ويعالج وينافس. وقوي وجيش وإنتاج وآي تي، طب والهند فيها إيه؟".
وأكمل: "يا جماعة، أنا عارف إنه مش في الزمن ده، بس هم الناس ما كانوش في الزمن ده، ابتدوا زمان قوي ده احنا عايشين لسه على الاحتلال الإنجليزي وغاندي الأربعينات يعني كان إيه؟ كان راجل ماشي بعصاية كده وعامل الحتة القماش على جسمه وماشي وسط الهند علشان يحررها دي بلد اتقسمت تلاتة".
واختتم: "أنا ما بكلمكش على الصين وعلى روسيا… لا، حاشا لله أنا بكلمك على اللي أنتم دايمًا بتتريقوا عليه ففي هذه الليلة القمرية، في هذا القمر الأحمر، يجب أن ننظر ونتأمل: أين نحن؟ أين قدرتنا؟ أين وجودنا؟".
