الساحل الشمالي اتحول من منطقة كنا بنعتبرها مصيف خلال شهور الصيف لبؤرة اهتمام السوق العقاري في العالم كله.
طب إيه اللى حصل في المنطقة دي؟.. وإزاي مشروع زي رأس الحكمة قلب الخريطة، وخلى شركات التطوير العقاري تتسابق على الأرض هناك؟.. وحجم سوق مبيعات العقار في المنقطة دي وصل قد إيه؟
الساحل الشمالي دلوقتي بيستحوذ على حوالي ٦٠ % من مبيعات العقارات في مصر، يعني أكتر من نص السوق كله.
وده حسب كلام أحمد إبراهيم، رئيس جهاز تنمية مدينة العلمين الجديدة، اللي أكد إن في تحول استراتيجي بيحصل، بيحوّل الساحل من مصيف موسمي لمكان سكن واستقرار طول السنة.
مشروع رأس الحكمة كان نقطة التحول، وبمجرد الإعلان عنه، الاستثمارات اتدفعت بشكل أكبر، والمطورين بقوا شايفين مستقبل المنطقة بشكل مختلف.
النهارده في ما بين ٣٠٠ لـ٣٥٠ ألف عامل شغالين في مشروعات الساحل، والعلمين الجديدة بقت مش بس مدينة سياحية، دي بقى فيها حوالي ١٤ ألف طالب جامعي، يعني نشاط اجتماعي وسكني حقيقي.
الدولة كمان بتلعب دور مهم. من ناحية بتدي حوافز للمستثمرين، ومن ناحية تانية بتحط اشتراطات صارمة عشان تضمن إن التنمية تبقى حقيقية، ومش مجرد مضاربات أو تجميد أراضي.
عندك كمان مشروع رأس الحكمة مش بس غير شكل الاستثمار العقاري في الساحل، لكن كمان بقى ملف استراتيجي لمستقبل الاقتصاد المصري.
الحكومة بتتعامل مع الأراضي بشكل مدروس: تسهيلات في التراخيص ورسوم تنازل محدودة مقارنة بالقيمة السوقية، عشان تسرّع وتيرة التنفيذ.
التوقعات كمان ضخمة.
شركة زي بورد كونسالتينج، ودي متخصصة فى استشارات الأعمال، شايفة إن مبيعات الساحل الشمالي ممكن توصل ١٠ مليارات دولار بنهاية ٢٠٢٥.
أما سوق العقارات السكنية في مصر عمومًا فمتوقع يكبر من ٩.٤ مليار دولار في ٢٠٢٥ لـ١٤.٧ مليار دولار في ٢٠٣٠.
ولو بصينا على أكبر ١٠ شركات تطوير عقاري في مصر، هنلاقي قفزة كبيرة جدًا في المبيعات بنسبة ٤٧% خلال أول نص من السنة، وصلت لـ٦٥١ مليار جنيه.
مجموعة طلعت مصطفى لوحدها باعت بـ٢١١ مليار جنيه، يعني حوالي تلت السوق الكبير ده.
– بعدها بالم هيلز بـ١٤٣ مليار، وإعمار مصر بـ٧٨ مليار.
الطلب كمان مش محلي بس.. في طلب خليجي قوي على عقارات الساحل الشمالي، وده زوّد من مبيعات الشركات، وفي نفس الوقت، خطط السداد الطويلة – اللي وصلت لـ١٢ و١٤ سنة – ساعدت ناس كتير تدخل السوق.
الساحل الشمالي دلوقتي مبقاش "مصيف"، ده ستقبل استراتيجي، بيمثل أكتر من نص مبيعات العقارات في مصر.
ومع رأس الحكمة والعلمين الجديدة، إحنا بنتكلم عن منطقة ممكن تتحول لواجهة استثمارية عالمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
