ليه أسعار الدهب والنفط والدولار بتتغير بشكل جنوني بين يوم وليلة؟ .. مين بيتحكم في اقتصاد العالم؟ .. وإزاي ممكن قرار سياسي واحد ممكن يغير خريطة الاقتصاد العالمي بالكامل .. قرار ميتعلقش ببنوك ولا مؤسسات مالية .. ده قرار بين أكبر قوتين اقتصاديتين في العالم .. أمريكا والصين.
أمريكا والصين قرروا يمددوا الهدنة التجارية بينهم لمدة 90 يوم تانيين .. يعني إيه الكلام ده؟
ببساطة شديدة .. يعني لا رسوم جمركية جديدة .. ولا تصعيد في الحرب الاقتصادية اللي بقالها سنين شغالة بينهم .. وكأنهم بياخدوا "هدنة" من الصراع .. يمكن عشان يفكروا أو يمكن عشان ياخدوا نفس عميق قبل الجولة اللي جاية.
الخبر ده في حد ذاته خبر إيجابي .. لأنه بيخفف التوتر في الأسواق العالمية .. وبيقلل المخاوف من ركود اقتصادي محتمل .. وبيطمن المستثمرين اللي كانوا خايفين من مستقبل غامض .. عشان كده شفنا رد فعل إيجابي من الأسواق بعد الإعلان ده مباشرة.
بس إيه معنى القرار ده على المدى البعيد؟ وهل فعلا دي نهاية الحرب التجارية؟
الإجابة لا .. دي مجرد هدنة مؤقتة .. هدنة بتدي فرصة للطرفين إنهم يتفاوضوا ويحاولوا يوصلوا لاتفاق نهائي .. بس هل هيوصلوا للاتفاق ده؟ .. ده سؤال صعب إجابته.
خلينا ندخل في المهم .. إيه تأثير القرار ده على اسعار الدهب والدولار والنفط؟
الدهب معروف إنه "الملاذ الآمن" للمستثمرين .. يعني لما الدنيا بتتوتر سياسيا أو اقتصاديا .. الناس بتجري تشتري دهب عشان تحافظ على قيمة فلوسها .. وبالتالي سعر الدهب بيرتفع .. لما الهدنة دي اتمددت .. ده قلل التوتر في الأسواق .. وده معناه إن سعر الدهب ممكن يفضل مستقر أو ينزل شوية .. لأن المخاوف من أزمة اقتصادية عالمية قلت.
بس ده مش معناه إن الدهب خسر قيمته .. الدهب هيفضل استثمار مهم .. لكن التوقعات بتقول إنه مش هيشهد ارتفاعات جنونية في الفترة الجاية .. إلا لو فشلت المفاوضات بين أميركا والصين.
أما الدولار فهو العملة الاحتياطية الأولى في العالم .. أي قرار اقتصادي عالمي بياثر على قيمته .. لما أميركا والصين أعلنوا عن الهدنة .. ده أدى لزيادة التفاؤل بإن الاقتصاد العالمي هيتعافى .. وده بيقوي الدولار لأنه مرتبط بقوة الاقتصاد الأميركي .. بس في نفس الوقت .. فيه ناس بتشوف إن الهدنة ممكن تقلل الحاجة للدولار كملاذ آمن في وقت الأزمات .. وبالتالي ممكن يضعف شوية
المؤكد هو إن الدولار هيفضل قوي في الفترة الجاية .. لكن مستقبله مرتبط بشكل كبير بنتيجة المفاوضات.
وبالنسبة للنفط فهو ترمومتر الاقتصاد العالمي .. لما الاقتصاد العالمي بيبقى قوي والإنتاج بيزيد .. الطلب على النفط بيزيد وسعره بيرتفع .. ولما الاقتصاد بيبقى في حالة ركود .. الطلب بيقل وسعر النفط بينزل .. الهدنة التجارية بتدي مؤشر إيجابي على إن الاقتصاد العالمي ممكن ينمو بشكل أفضل .. وبالتالي الطلب على النفط هيزيد .. وده ممكن يخلي أسعاره ترتفع.
بس لازم نفتكر إن فيه عوامل تانية كتير بتتحكم في سعر النفط .. زي الإنتاج في الدول الكبرى وقرارات منظمة أوبك.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
