أحمد شوبير: "الهري والهبد" انتهى في الزمالك.. والنادي سيعود منافسًا قويًا

أكد الإعلامي أحمد شوبير أن نادي الزمالك يسير في الطريق الصحيح حاليًا، مشيرًا إلى أن حالة "الفوضى" التي كانت تسيطر على المشهد الإداري والفني في الفترات السابقة بدأت تتلاشى، وأن هناك نظامًا حقيقيًا بدأ يُطبق داخل القلعة البيضاء، ويستعرض تحيا مصر التفاصيل. 

شوبير: حالة الفوضى في الزمالك انتهت 

وقال شوبير خلال برنامجه الإذاعي صباح اليوم عبر "راديو أون سبورت إف إم": "أقدر أقولكم وبكل وضوح إن نادي الزمالك دلوقتي بقى فيه نظام. الهري والهبد بتاع زمان خلص، والناس بدأت تشتغل صح وبتخطط لمستقبل الفريق بشكل جاد".

وأضاف: "أنا بتكلم هنا عن إدارة بدأت تشتغل على ملفات مهمة جدًا، من أبرزها تدعيم الفريق بعناصر قوية، وحسم موقف الجهاز الفني، وعودة الانضباط لغرفة الملابس، وهي كلها أمور كانت غائبة عن الزمالك في المواسم الأخيرة".

وتابع شوبير: "الزمالك هيكون منافس قوي جدًا في الموسم القادم، ومش هتكون مفاجأة لو نافس على كل البطولات المحلية والقارية. الناس بتشتغل بجد وعاوزين يعوضوا الجماهير عن المواسم اللي فاتت".

وأوضح حارس مرمى الأهلي السابق أن التعاقدات التي أبرمها الزمالك مؤخرًا تدل على وجود خطة واضحة لإعادة الفريق إلى مكانته الطبيعية، مشيدًا بالصفقات الجديدة التي وصفها بـ"المدروسة والمفيدة فنيًا"، وليس مجرد تعاقدات جماهيرية.

وتابع: "فيه تركيز دلوقتي على التعاقد مع لاعبين عندهم شخصية وقادرين يضيفوا للفريق. وده واضح من نوعية الصفقات اللي الزمالك بيحاول يخلص فيها، وكمان من قرارات الإدارة اللي بدأت ترجع هيبة النادي".

وفي ختام تصريحاته، قال شوبير: "افتكروا كلامي كويس.. الزمالك راجع وبقوة، والموسم اللي جاي هيكون مختلف تمامًا عن اللي فات. خلاص، زمن العشوائية والفوضى خلص، دلوقتي فيه نادي بيشتغل بنظام واحترام".

تصريحات شوبير عن صفقات الزمالك 

وقال شوبير، عبر برنامجه الإذاعي صباح اليوم الأربعاء: “ الزمالك ظبط فرقته تمامًا بعد إعلان تعاقده بالأمس مع عدي الدباغ، وكل المؤشرات بتقول أنه مهاجم كويس”.

وتابع: “ الزمالك ماشي بهدوء وتروي، وشكله ناجح والسبب إن مشكلته الإدارية اتحلت، وكمان الناس كانت بتطلب مجلس الإدارة بطلبات كتير، بس المجلس كان لازم ياخد وقته عشان يقدر يوفر مطالب الأجهزة الفنية”.

وأضاف: “ الناس بتتعامل بهدوء جوه الزمالك، والصفقات تمت بهدوء أيضًا، وماسمعناش أي تصريحات من أي نوع من مسئولي الفريق سواء من عبد الناصر محمد أو جون إدوارد، وأنا من وجهة نظري شايف إن ده نجاح”.