يا ترى هو ليه أسعار بعض السلع نزلت، وإيه هي السلع دي، وهل ممكن الانخفاض ده يبقي بداية لانخفاضات تانية قريب؟
في الحقيقة، في تحركات جديدة في الأسواق، وسجلت أسعار 12 سلعة تراجع ملحوظ مقابل ارتفاع في 8 تانيين، يعني السوق مولع بس في الاتجاه العكسي.
طيب إيه اللي غلي؟
الزيت بأنواعه والفول والعدس والدقيق، فدول عملوا قفزات محترمة، وصلت في بعض السلع لحد 23%، بس خلينا نركز في اللي نزل عشان نحس بشوية أمل كده في عز الزحمة الاقتصادية دي.
المكرونة نزلت، و الكيلو المعبأة نزل تقريبا جنيه وبقى ب 27.16 جنيه، اما العبوة الصغيرة 400 جرام فنزلت 4.6 جنيه مرة واحدة، وده تراجع ضخم بنسبة 16%.
كمان، كرتونة البيض نزلت لأقل من 135 جنيه، البيضة البيضاء ب 4.75 جنيه، والبلدي نزلت لحد 5 جنيه بس، وبردو شاي العروسة 40 جرام نزل ل 10.33 جنيه، وليبتون بقى بـ 11.75 جنيهروكيلو الشاي نفسه نزل 12 جنيه تقريبا.
طيب ده معناه إيه؟
ده معناه، إن المعروض من السلع دي زاد أو الطلب قل أو الاتنين سوا، وده ممكن يكون نتيجة سياسات رقابية أو مبادرات خفض الأسعار أو تحركات من اتحاد الغرف التجارية زي ما سمعنا.
فوق كل ده، الاتحاد أطلق مبادرة عاجلة لتخفيض الأسعار بتوجيه من رئيس الوزراء، وده معناه إن في متابعة من فوق وقرارات بتتطبق، بس خد بالك في سلع تانية بتغلي في نفس الوقت، زي الزيت اللي وصل ل 99.67 جنيه، والفول المجروش اللي طار ل 75 جنيه، يعني السوق مش ثابت وكل يوم ليه ظروفه.
والخلاصة، هي ان في تراجع في بعض الأسعار وده شيء إيجابي، لكن لازم نفضل نتابع، ونشوف هل التراجع ده هيتثبت ولا مؤقت، وهل في رقابة حقيقية على السوق، وهل التاجر هيسيب التراجع ده يوصل للمستهلك ولا هيخزن ويلم فرق السعر لنفسه؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
