يا ترى لجنة تسعير البنزين هتفاجئنا بإيه المرة دي؟.. هل البنزين هيزيد من تاني ولا الحكومة هتمسك نفسها؟.. ليه كل شوية نسمع عن اللجنة دي؟ وإزاي بتحدد السعر أصلًا؟.. وهل الدولار هو السبب؟ ولا سعر البترول العالمي هو اللي بيحرك اللعبة؟.. وهل مصر ناوية ترفع البنزين؟ ولا فيه نية للتثبيت شوية؟
الناس دلوقتي عايشة في حالة ترقب وانتظار، مستنيين لجنة تسعير البنزين تقول كلمتها.. الكل بيسأل: إمتى الاجتماع؟ والأسعار هتزيد تاني؟ ولا هنفضل على كده؟
اللي بيخلي الناس قلقانة أكتر، إن الدولة ماشية في اتجاه رفع الدعم تمامًا عن البنزين والسولار مع نهاية سنة 2025، يعني الدعم اللي متبقي مش كتير، وكل اجتماع جاي ممكن يبقى فيه قرارات تقيلة!
آخر مرة اللجنة اجتمعت فيها، كانت في 11 أبريل اللي فات، ووقتها رفعت الأسعار كلها، من أول بنزين 80 لحد 95، وكمان السولار وأسطوانات البوتاجاز، والأسعار وصلت لحد:
بنزين 95 بـ 19 جنيه للتر وبنزين 92 بـ 17.25 جنيه وبنزين 80 بـ 15.75 جنيه والسولار بـ 15.50 جنيه وأسطوانة البوتاجاز المنزلي بـ 200 جنيه والتجاري بـ 400 جنيه.
طيب، إمتى الاجتماع الجاي؟
حسب كلام رئيس الوزراء مصطفى مدبولي، اللجنة هتجتمع في أكتوبر 2025، وده بعد ما غيروا نظام الاجتماعات وبقت مرتين في السنة بدل كل ٣ شهور.
طيب اللجنة دي بتحدد الأسعار على أساس إيه؟
فيه معادلة معينة بيحسبوا بيها الأسعار، بتعتمد على 3 حاجات، سعر خام برنت العالمي وسعر الدولار قدام الجنيه وتكاليف النقل والتكرير والمصاريف الإدارية، لكن فيه كمان قلق جديد طالع من ضريبة القيمة المضافة الجديدة بنسبة 10% اللي اتفرضت على البترول الخام، وناس كتير بدأت تسأل:
هل الضريبة دي معناها إن الأسعار هتزيد قبل أكتوبر؟.. هل فيه مفاجآت جاية في الطريق؟
الضرائب قالت إن الضريبة دي بتتطبق بس على القطاع الخاص، ومش معناها إن الأسعار هتتغير رسمي، لأن اللجنة هي اللي بتقرر، مش الضرايب ولا البرلمان.
الخلاصة؟.. احنا في مرحلة انتقالية، الدعم بيخلص، والأسعار بتزيد خطوة خطوة، والكل مستني أكتوبر، يشوف القرار الجاي هيكون فيه إيه.. والسؤال اللي شاغل دماغ الكل: هل هنوصل للتر بنزين بـ 25 جنيه قريب؟ ولا الحكومة هتلاقي حل وسط يخفف الحمل عن الناس؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
