يا ترى ليه الدهب دلوقتي عامل شغل جامد، هل ده بسبب تراجع الدولار، طب الأسعار دلوقتي عاملة وإيه التوقعات بتاعتها لحد نهاية 2025؟
في الحقيقة، أسعار الدهب ارتفعت بشكل ملحوظ في الأيام الأخيرة سواء في السوق المحلي أو العالمي، وعندنا في مصر الجرام عيار 21 وصل ل 4655 جنيه، وكمان الأوقية عالميا طلعت حوالي 17 دولار مرة واحدة وبقت بـ 3567 دولار.
أما عيار 24 فسجل 5320 جنيه، وعيار 18 بقى ب 3990 جنيه، والجنيه الدهب قرب من 37240 جنيه.. طب هو ايه اللي حصل؟
بص يا سيدي، السبب الرئيسي هو سقوط مؤشر الدولار بعد تصريحات من واحد من الكبار في الفيدرالي الأمريكي، واللي قال فيها كلام بيدي انطباع إنهم ممكن يخفضوا الفايدة في شهر سبتمبر الجاي، يعني فلوسك في البنك هتجيب أقل، يبقى الناس تروح فين؟ على الدهب طبعا، لأنه ملاذ آمن وقت الزنقة.
وكمان، الرئيس الأمريكي دونالد ترامب، طلع قال انه ناوي يفرض رسوم 20% على واردات من أوروبا من أول أغسطس الجاي، يعني الحرب التجارية شغالة، والناس بتجري على أي حاجة تحافظ على قيمتها، والدهب أولهم.
لكن خليك فاكر، مش كله وردي، وده لان الناس لسه مترددة تدخل باستثمارات كبيرة في الدهب، وده عشان رغم كل المؤشرات، الا ان في احتمال الفيدرالي مايخفضش الفايدة دلوقتي، ولو ده حصل فالدولار هيتماسك شوية والدهب ممكن يهدى.
يعني التوقعات عاملة زي الميزان، لو خفضوا الفايدة فعلا فالدهب هيكمل صعود، لكن لو الفيدرالي أتراجع فممكن نشوف تهدئة مؤقتة.
فوي كل ده، الأسبوع ده مهم جدا، لاننا عندنا كلمة منتظرة من جيروم باول رئيس الفيدرالي بكره، وكمان بيانات بيع البيوت ومعدلات البطالة وتقارير إنفاق الشركات، فكل ده هيأثر بشكل مباشر على حركة الدهب.
يعني باختصار، الدهب حاليا في موقف قوة، واستفاد من ضعف الدولار ومن مخاوف الحرب التجارية وكمان من احتمالات خفض الفايدة، بس اللي هيحدد الاتجاه الحقيقي هو البيانات اللي جاية وتصريحات كبار الفيدرالي.
ولو ناوي تبيع او تشتري دهب، فنقدر نقولك ان لما الدولار بيضعف والفيدرالي بيميل للتيسير، فده بيعتبر إشارة إيجابية للدهب، لكن لازم تبص على الصورة الكبيرة، لو أنت ناوي تحتفظ بالدهب كأداة للتحوط أو استثمار طويل المدى، يبقى الدخول دلوقتي مش وحش.
كمان لازم تتابع السوق كويس لإن الدهب ممكن يهدى شوية في أي لحظة حسب تطورات الفايدة أو أي أخبار عالمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
