قطر داخلة بثقلها في مصر، وهتعمل مشروع جديد هيغير خريطة الاستثمار بمنطقة الشرق الأوسط.. ياتري اية هو المشروع الجديد.. واية الفايدة اللي هترجع علي مصر منه.
مشروع الاستثمار السياحي في منطقة راس الحكمة واللي كان أول وأهم خطوة في تاريخ الاقتصاد المصري، واللي انقذ مصر في مرحلة حرجة جدا كانت فيها الدولة بتعاني من نقص شديد في العملات الأجنبية بالبنك المركزي والبنوك الوطنية، ولولا توقيع العقد ده كان للاسف الاقتصاد المصري هيكون في منطقة حرجة جدا وكانت الأمور هتكون في منطقة سيئة جدا غير اللي موجودة عليها حالا.
العائدات المالية المباشرة لصفقة الاستثمار السياحي في منطقة راس الحكمة وصلت لـ45 مليار دولار بشكل مباشر منهم 10 مليار دولار كانوا ديون علي الحكومة المصرية لدولة الأمارات، والتوقعات أن إجمالي الاستثمار التراكمي للمشروع هيوصل لـ110 مليار دولار في 2045، ده غير أن الصفقة هتساهم بشكل كبير في الناتج المحلي للاقتصاد المصري بما يقرب من 25 مليار دولار، ده غير أنها هتوفر ما يقرب من 750 ألف فرصة عمل بشكل مباشر وغير مباشر.
مشروع الاستثمار في منطقة رأس الحكمة فتح شهية عدد كبير من الدول وصناديق الاستثمار للدخول والاستثمار في المشروعات المصرية، والمرة دي قطر دخلت في مشروع جديد في منطقة الساحل الشمالي.
طيب ايه حكاية المشروع الاسثتماري الجديدة اللي قطر عايزة تعمله في مصر ؟.
في الوقت اللي فاتت الحكومة القطرية دخلت في مناقشات مباشرة مع مصر لمناقشة الاتفاق لإقامة مشروع سياحي باستثمارات أولية هتوصل لـ4 مليار دولار في منطقة علم الروم على الساحل الشمالي،ودي منطقة اتسمت بالأسم ده بسبب وجود حصن روماني قديم فيها، وهيا موجودة في شرق مدينة مرسى مطروح، وبتعد وجهة مفضلة لعشاق الصيد والسياحة العائلية بسبب شواطئها الهادئة وجمال طبيعتها، وتفصلها ما يقرب من 50 كيلو متر عن مدينة رأس الحكمة اللي جذبت استثمارت إماراتية بقيمة 35 مليار دولار في أكتوبر 2024.
الجهات المسئولة في مصر وقطر في الوقت الحالي بيحطوا اللمسات النهائية على مشروع سياحي كبير هيغير خريطة الساحة العالمية في مصر ومنطقة الشرق الأوسط.
المشروع الجديد اللي الحكومة ممثلة في الدكتور مصطفى مدبولي رئيس الوزراء، ناقش تفاصيله مع نظيره القطري الشيخ محمد بن عبد الرحمن آل ثاني، تضمنت إنشاء مدينة سياحية متكاملة على مساحة هتوصل لـ 60 ألف فدان هتخصص بنظام حق الانتفاع لصالح جهاز قطر للاستثمار.
المخطط الأولي للمشروع بيستهدف انشاء عدد كبير من المنتجعات السياحية العالمية وعدد كبير من الوحدات السكنية الفاخرة، ده غير عدد من المراكز التجارية والترفيهية، إضافة إلى مرسى لليخوت ومرافق خدمية متطورة زي ما حصل في منطقة راس الحكمة.
المرحلة الأولى من المشروع هتشغل بين 20% و25% من إجمالي مساحة المشروع، وحصة الحكومة المصرية من إيرادات المشروع هتوصل لـ 15% من إجمالي الإيرادات بعد تنفيذ جميع المراحل، والمبالغ المخصصة للمشروع واللي هتوصل لـ 4 مليار دولار هتشمل حق الانتفاع بأرض المشروع بالإضافة إلى تكاليف البنية التحتية اللي هتنفذها الحكومة في المنطقة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
