في خطة جامدة الحكومة أعلنت عنها لتطوير 9 مصانع من بتوع قصب السكر اللي موجودين في الصعيد، زي مصانع نجع حمادي، وقوص، وأرمنت، ودشنا، وغيرهم.
طيب إيه الهدف؟
الهدف أن عندنا مصانع قديمة من أيام ما كان التلفزيون أبيض وأسود! كفاءة الإنتاج فيها قليلة، وبتستهلك طاقة ومية بشكل كبير، وكمان بتكلف أكتر ما بتكسب، فاللي بيحصل دلوقتي، إن الحكومة ناوية تدخل تقنيات حديثة وتطور المعدات وتقلل الهدر.
وده معناه: السكر المصري هيكون أنضف وأرخص، والمزارعين هيستفيدوا أكتر لأن المصنع هيشتري منهم القصب بسعر أحسن، وهيوفر فرص شغل جديدة للشباب، لأن المصانع دي لما تشتغل بكفاءة هتحتاج عمال أكتر، وعلى فكرة، التطوير ده جزء من خطة الدولة علشان تحقق الاكتفاء الذاتي من السكر، بدل ما نستورد ونصرف بالدولار.
تعالى أقولك باختصار الموضوع هيمشي إزاي؟.. بص يا سيدي، قصب السكر مش بس عصير حلو بنشربه في الحر، لأ ده محصول استراتيجي مهم جدًا للدولة، لأنه المصدر الرئيسي للسكر اللي بناكله في بيوتنا، وعلشان كده الحكومة بدأت تتحرك، وبتطور 9 مصانع كبيرة بتشتغل على قصب السكر، زي المصانع اللي ذكرناها.
ليه التطوير ده مهم؟.. لأن قصب السكر ومعاه كمان بنجر السكر ساعدوا نرفع إنتاجنا المحلي، والتقارير بتقول إننا على آخر سنة 2025 ممكن نعدي 3 مليون طن سكر، وده معناه إننا نوصل للاكتفاء الذاتي.. يعني مش هنحتاج نستورده تاني.
ومن هنا حصل اجتماع كبير بين وزير الري ووزير التموين، واتكلموا فيه على نقطتين مهمين، أول حاجة تطوير المصانع علشان تشتغل بكفاءة أعلى وتاني حاجة نحمي المية من التلوث اللي بييجي من مخلفات المصانع دي، يعني مش بس هننتج سكر، ده كمان هننتجه بطريقة نظيفة وصديقة للبيئة، وده مهم جدًا لحماية نهر النيل والمجاري المائية.
كمان ناقشوا إزاي نستفيد من مخلفات المصانع، بدل ما تبقى عبء على البيئة، وقالوا هيبدأوا يطبقوا خطة اسمها "الإصحاح البيئي" علشان مياه الصرف اللي طالعة من المصانع تبقى متوافقة مع المعايير البيئية.
مش بس وكده، ده من ضمن الحاجات اللي هتتعمل، استخدام أبراج تبريد توفر في المية وتدوير الميه جوه المصنع علشان نقلل الاستهلاك وتطوير وحدات المعالجة، وكمان رفع كفاءة التشغيل بشكل عام.
ده غير كمان إن وزارة الزراعة نزلت نشرة للمزارعين فيها توصيات عشان يزودوا الإنتاج، زي إنهم يخلّصوا التسميد قبل آخر الشهر، وينظموا الري، ويتابعوا أي أمراض أو حشرات في الزرع ويعالجوها بسرعة.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
