أشاد الموسيقار الكبير هاني شنودة بأجواء مهرجان العلمين الصيفي، مؤكدًا أن التنظيم والجمهور والإدارة ساهموا في نجاح الفعاليات، كما عبّر عن رأيه في المنافسة الفنية بين النجمين عمرو دياب وتامر حسني خلال موسم الصيف الحالي.
هاني شنودة يشيد بـ مهرجان العلمين
وقال هاني شنودة، خلال لقائه مداخلة هاتفية مع برنامج بنظرة تانية الذي يقدمه الإعلامي محمود الجلفي على قناة الشمس في تصريحات رصدها موقع تحيا مصر: مهرجان العلمين في منتهى الجمال، إحنا كفرقة المصريين عملنا حفلة هناك، وإن شاء الله نعمل حفلة تانية، قابلنا جمهور محترم جدًا، والإدارة كانت حكيمة ومنضبطة، والأهم إن الناس كانت فاهمة هي جاية ليه… وده بيفرق جدًا.
هاني شنودة: مفيش مقارنة بين عمرو دياب وتامر حسني
وحول المنافسة بين عمرو دياب وتامر حسني هذا الصيف، قال شنودة مازحًا: “بص حضرتك… إنت بتكلمني في حاجة محسومة! يعني لما يبقى قدامك منجا وبطيخ وأناناس… تختار إيه؟ كله طبعا، مافيش مقارنة بين الاتنين، كل واحد في مكانه، بس عمرو دياب حاجة تانية خالص.
ووجّه هاني شنودة رسالة مباشرة للهضبة قائلاً: “برافو عليك يا عمرو، وبرافو عليك تاني، كتير من أعمالك هيفضل موجود بعد ما كلنا نمشي، ربنا يديك الصحة، وإبداعك مش هيخلص”.
هاني شنودة عن مشاركة ابنة عمرو دياب معه: شيء جميل ومؤثر
وفي ختام حديثه، علّق الموسيقار الكبير هاني شنودة على مشاركة ابنة عمرو دياب في إحدى أغانيه، قائلًا: “عمرو دياب عمل حاجة كان لازم تتعمل. فرانك سيناترا خلى بنته تغني معاه، وفكرة إن البنت تغني مع أبوها دي بتخلق رابط وإحساس ماكناش متوقعينه… وده شيء جميل ومؤثر جدًا”.
هذا وكان قد تحدث هاني شنودة في وقت سابق عن إمكانية مشاركته في عمل فني مع أحد مطربي المهرجانات، قائلا: انا لو اتعرض عليا عمل لحن لمطرب مهرجانات، اوافق ولكن علي شرط وحيد هو التأني في اختيار الكلمات ويكون عمل نضيف ومحترم وليه عمق، ان ليه ميكونش فيه مهرجانات وطنية، ومهرجانات عاطفية، ومهرجانات اجتماعية، ليه لا، دلوقتي مهرجانات علي الفاضي وكلام جارح، مؤكدا انه في تاريخه بالكامل لا يوجد عمل يضم لفظ خارج او جارح.
