تحدث مطرب المهرجانات المعتزل علي قدورة عن اعتزاله الغناء، وشعوره بالذنب تجاه ذلك، وذلك خلال مداخلة هاتفية ببرنامج بنظرة تانية الذي يقدمه الإعلامي محمود الجلفي على قناة الشمس، مشيرا إلى أنه راضي تماما عن عن قرار اعتزاله.
على قدورة: كان بيجيلي تأنيب ضمير
وقال على قدورة في تصريحات رصدها موقع تحيا مصر: أكيد طبعًا كان بيجيلي تأنيب ضمير، وده اللي حصل مؤخرًا وخلاني أعلن اعتزالي، وأتبرأ من كل الأغاني لوجه الله، وكفاية عليا ذنوب.
وتابع: قبل كده كنت في غفلة، وكنت بفكر إن الحاجة دي حلال طالما إني مش بأذي حد ولما فوقت اعتزلت، فيه فنانين بيغنوا وشايفين نفسهم متدينين، بس أنا كنت بعيد تمامًا، وفيه حاجات كتير ممكن تبقى هادفة زي الأفلام والشِعر والإلقاء، لكن المعازف والرقص دي أنا كنت واقع فيها وهي حرام تماما.
علي قدورة يتحدث عن الفنان أحمد عامر
وتعليقًا على وصية الفنان أحمد عامر بحذف أغانيه بعد وفاته، قال قدورة: طالما إنت عارف إنها لازم تتمسح بعد موتك، يبقى إنت عارف إنها حرام.
واستكمل علي قدورة أحمد عامر كان إنسان طيب ومكنش بيعمل مشاكل، بس لو حد عايش وبيقول امسحوا الأغاني بعد موتي، طب ما إنت لسه عايش.
علي قدورة عن تصريحات مدحت العدل: كلامه مش منطقي بصراحة
كما علّق على قدورة تصريحات الكاتب مدحت العدل بشأن اعتزال حفيدة كوكب الشرق أم كلثوم، قائلاً: الناس بتتكلم في أي حاجة، هو ليه بيقول لبست حجاب ولا لأ؟، هو مالُه؟، هي عملت الصح وربنا يثبتها، هو عاوزها تقلع الحجاب وتكون متبرجة؟، كلام مش منطقي بصراحة.
وكشف علي قدورة عن ردود الفعل التي تلقاها بعد إعلان اعتزاله، وإمكانية اعتزال حسن شاكوش وحمو بيكا، قائلًا: الترة اللي اعتزلت فيها كانت ملفتة لكل الناس، وفيه ناس كلموني وقالولي ربنا يهديك، ودعموني، وأنا شايف إن كل واحد جواه نية، وكل واحد محتاج يقعد مع نفسه ويفكر، وربنا كريم.
علي قدورة: برنامجي مش ديني
وتطرق علي قدورة بحديثه عن برنامجه: برنامجي شبابي اجتماعي، وأنا مستني الناس تشوفه وتحكم، وردًا على سؤال هل ده برنامج ديني ولا لأ؟، رد علي قدورة قائلاً: هو مش برنامج ديني، لأني مش شيخ، إنما فكرتي كانت إننا نوجّه الشباب ونديهم نصايح تساعدهم لما يمروا بمشاكل، وقدمنا ده بلغة الجيل الجديد علشان يحسوا إنه قريب منهم.
وعن اعتزاله الفن رغم نجاحه وانتشاره، تابع: القرار مجاش في يوم وليلة، كنت بفكر فيه من فترة، وبالذات في آخر أيام ليا في المجال، وكنت بحاول أقرب من ربنا، والغناء اللي بدأت به كان طاقة شبابية أو نزوة، وكان الهدف منها إني اشتهر.
وأضاف: الحرام بيّن والحلال بيّن، وكلنا عارفين ده. وأنا كمسلم شايف إن المزيكا حرام بكل أنواعها، وأنا هتكلم عن حتتي، اللي هي المزيكا والمعازف، واللي بشوف إنها نوع من لهو الحديث، اللي بيخلي الناس تهرب من مشاكلها، ويحرك غرائز، ويدفعهم يقولوا كلام مش كويس.
