عاجل.."بيهكر تليفون زميلاته لابتزازهن".. فضـ.يحة محامي داخل محكمة حلوان

قالت المحامية،" انا هاجر يحيى محاميه قيد ابتدائي دائرة الموسكى و والدى الأستاذ يحي زكريا محامى نقض و حصل معايا مشكلة عاوزه اشاركها مع الزملاء و الزميلات عشان لو منهم واحده اتعرضت لنفس مشكلتي ..يوم الاتنين الموافق ١٤ / ٧ / ٢٠٢٥ كنت بحضر جلسة بمحكمة اسرة حلوان بوادي حوف و بعد انتهاء الجلسة جالي محامى استأذنى و طلب منى تليفوني لو معايا انترنت علشان يبحث على حاجه على موقع وزاره العدل لانه معهوش انترنت و انا بالفعل عملت سيرش و اديتله الموبايل مفتوح عليه الموقع و مكنتش شايفه هو بيعمل ايه بالظبط فى الموبايل بس لما طول شويه بصيت لقيته فاتح الوتساب بتاعى مش موقع وزاره العدل".

تابعت،" اخدت منه التليفون و لقيت رساله من رقم غريب ٠١٥ مكتوب فيها نصاً " انا روحت متأخر " انا روحت رديت قولت "مين ؟ " رد قالى " انا مودي يبنى " ده اللى اتكتب بالحرف منى و من الرقم الغريب طبعا اول ما شوفت كده اتخضيت و فهمت ان المحامى ده هكر الوتساب او يمكن تليفونى كله الحمد لله انا ربنا الهمنى حسن التصرف و نزلنا قسم المعصره وانا فى حاله من الانهيار دخلنا و عملت محضر مع انكاره بانه فتح الوتساب بتاعى اصلا وقال فى المحضر انه مطلبش منى التليفون وان انا اللى عرضت عليه اديله تليفونى و انا بعمل المحضر كنت فى حالة شديده من الانهيار و كانت فى زميله محاميه داخله القسم بتعمل شغل لها و سمعتنى فسألت عن الموضوع لانه تطابق مع اللى حصل معاها من قبل اسبوع تقريبا فسألتنى و قالتلى ان حصل معاها نفس الموقف من نفس المحامى و جالها نفس الرسايل من نفس الرقم بس هى عملت حظر للرقم و مشكتش فى المحامى و توقعت انه مجرد رقم غريب بيعاكس بطريقه عشوائيه لما سمعتنى بقا ربطت للاحداث ببعض و عملت معايا محضر".

واستطردت،" روحنا النيابة فى نفس اليوم و تليفوناتنا احنا التلاته اتحرزت للكشف عنها فى مركز تقنيه المعلومات و الفنين المختصين و خد اخلاء سيبل بضمان محل اقامته  انا بحكى الحادثه ديه لان المحامى ده عمل كده كتير مع بنات و ستات كتير سواء محاميات و غير محاميات فى المحاكم المختلفه لان حلوان مش دايرته اصلا والله اعلم هو بيعمل ايه بعد ما بيهكر الوتساب فلو حصل معاكى نفس الموضوع قبل كده و حصلك مشكله او حصلك اى ابتزاز من اى نوع ده بسبب ان الوتساب متهكر فممكن تشوفى حد يكون فاهم فى الموضوع ده و يفك التهكير ده و اى محاميه او اى ست عاوزة تتواصل معايا بخصوص الموضوع ده تتفضل".

واختتمت قائلة،" انا بحكى من اكونت جديد لان تليفونى و ارقامى ايملاتى مش معايا ده اكونت مؤقت لحد ما تليفونى يرجع تعديل : اسم المحامى خالد وليد أحمد دائرة حدايق القبة".