يا ترى ليه الدهب طالع الأيام دي بالشكل ده، إيه اللي خلى الجرام يزيد 30 جنيه في أسبوع واحد، وايع علاقة الدولار والسياسة الأمريكية باللي بيحصل؟.
في الحقيقة، الدهب بيغلى، وبالأخص عيار 21 اللي بدأ الأسبوع اللي فات على 4610 جنيه، وقفل على 4640 جنيه، يعني طالع حوالى 30 جنيه في أسبوع واحد.
وفي البورصة العالمية، الأوقية كمان زادت 63 دولار، ووصلت ل3337 دولار.. طيب ليه الارتفاع ده؟
بص يا سيدي، في 3 عوامل رئيسية ورا اللي بيحصل ده، واللي اولها التوترات الجيوسياسية، لان دلوقتي المنطقة بتغلي، وترامب بيكلم بوتين عن أوكرانيا من غير أي نتائج، وفي كلام عن دعم أمريكي جديد للدفاعات الجوية في أوكرانيا، وده كله بيخلي المستثمرين يتجهوا للدهب كملاذ آمن.
عندك كمان، الدولار بقى تحت الضغط، فؤغم إن إن أمريكا أعلنت إنها أضافت 147 ألف وظيفة في يونيو، وإن البطالة نزلت ل 4.1%، اللي المفروض يدي قوة للدولار، لكن السوق شايف إن في ضغط كبير جاي عليه، وفي احتمالية فرض رسوم جمركية جديدة على 100 دولة مع نهاية تجميد قرارات ترامب يوم 9 يوليو يعني الاربع الجاي.
وكمان، في مشروع قانون ضخم في أمريكا لتقليل الضرائب، وده ممكن يزود عجز الموازنة الفيدرالية ب 3.4 تريليون دولار خلال 10 سنين، وده كله بيخلي المستثمرين يشكوا في استقرار الدولار ويتجهوا للدهب.
تالت حاجة، هي البنوك المركزية بتشتري دهب، ودلوقتي في تحركات من البنوك المركزية حول العالم إنها تقلل اعتمادها على الدولار وتنوع احتياطياتها، وبتشتري دهب بكميات ضخمة، وده بيدعم سعره.
طب إيه التوقعات؟
محللين كبار، شايفين إن سعر الأوقية هيوصل ل 3500 دولار قبل نهاية السنة، وده معناه إن الأسعار عندنا في مصر ممكن تكمل في الطلوع، خاصة لو الدولار العالمي دخل في موجة هبوط.
طب الؤسؤال دلوقتي، تبيع ولا تشتري؟
بص يا سيدي، لو انت مستثمر وشارى دهب من فترة، ممكن تستنى شوية كمان لأن التوقعات لسه صاعدة، اما بقى لو بتفكر تشتري فخليك حذر، اشتري على مراحل، واستنى أي تراجع بسيط في السعر.
والخلاصة هي إن الدهب بيرتفع بسبب التوترات السياسية وكمان مخاوف من ضعف الدولار وبردو زيادة طلب البنوك المركزية عليه، وسعره ممكن يكمل طلوع لو الظروف دي فضلت مستمرة، خاصة مع قرب قرارات اقتصادية كبيرة في أمريكا الأسبوع ده.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
