ميدو يكشف موقفه من تطورات الأحداث في الزمالك: بقالنا سنين بنعاني والنادي مش ورث

وجه أحمد حسام ميدو، نجم الزمالك الأسبق، وعضو لجنة التخطيط السابق، رسالة بشأن ما يجرى حاليًا داخل أروقة القلعة البيضاء، بعد تولي جون إدوارد مهمة المدير الرياضي لقطاع الكرة.

ميدو: اللي بيحصل في الزمالك دلوقتي عظمة

كتب ميدو عبر حسابه الشخصي على منصة «إكس»: «اللي بيحصل في الزمالك دلوقتي عظمة، وطول عمري بحلم إن فريق الكورة يتقفل عليه، ويبقى معسكر الزمالك كأنه ثكنة عسكرية، وأنا متفائل خير إن فريق الكورة على الطريق الصحيح».

وأضاف: «بقالنا سنين بنعاني من تسريب أخبار الفريق، بقالنا سنين بنعاني من الناس اللي فاكرين الزمالك ورث شرعي، وإن الشغل فيه حق مكتسب، حتى ولو ماعندكش أي مؤهلات».

ميدو: ماليش مصلحة مع حد جوه الزمالك دلوقتي

وأوضح ميدو: «أنا والله ما ليا مصلحة مع أي حد جوه النادي دلوقتي، ولا حتى بتكلم مع أي حد جوه النادي، لا بكلم حد ولا برد على حد، وقررت إن الفترة الحالية أرجع مشجع بس، أرجع أروح ماتشات الزمالك من غير ما يكون ما بيني وما بين أي مسؤول في النادي أي كلام».

وتابع: «وأنا كزمالكاوي مبسوط جدًا، ومتفائل إن شاء الله، الزمالك بنظامه الاحترافي الجديد، هيكون منافس قوي على كل البطولات اللي هيشارك فيها الموسم ده».