ليه صندوق النقد الدولي قرر تأجيل صرف الدفعة الخامسة من القرض المصري ودمجها مع المرحلة السادسة.. هل ممكن مصر تتأثر بالقرار ده؟.. هل فيه أزمة جاية؟.. ولا كل حاجة تحت السيطرة.
إيه اللي حصل؟، صندوق النقد الدولي قرر تأجيل المرحلة الخامسة من برنامج القرض لمصر، عشان يدي فرص ووقت اطول للحكومة المصرية عشان تنفذ الاصلاحات الهيكلية اللي متفق عليها في برنامج الإصلاح الاقتصادي.. وده خلى ناس كتير تسأل: هل ده خطر؟ هل فيه أزمة جاية؟، بس أول حاجة لازم نفهمها، أن التأجيل مش معناه إن مصر مش ملتزمة، لكن ممكن يكون فيه ملاحظات من الصندوق على بعض الإجراءات، زي مثلاً سرعة تحرير سعر الصرف أو تقليل الدعم بشكل معين.
خبرا الاقتصاد قالوا أن تأجيل المراجعة الخامسة من صندوق النقد مش هيأثرعلى الاقتصاد المصري، لأن فيه تدفقات مالية ضخمة دخلت مصر أثرت على سعر الصرف خلال الأيام اللي فاتت، ده غير أن دمج المراجعتين الخامسة والسادسة لبرنامج مصر من صندوق النقد، ده تأجيل لكن متلغتش.
لكن السؤال المهم، هل القرار ده هيأثر على مصر؟
طبعا ممكن مصر تتأثر، لكن مش تأثير كبير زي زمان، طب ليه؟.. لأن مصر بدأت تنوع مصادر دخلها، ومابقتش معتمدة زي زمان على صندوق النقد بس، يعني مثلا دخل السياحة رجع تاني وبقوة، وخصوصا من الخليج وأوروبا، ده غير قناة السويس اللي لسه بتدخل ملايين الدولارات، كمان مصر وسعت في تصدير الأسمدة والغاز الطبيعي، غير طبعا الاستثمارات اللي جاية من الصناعة والطاقة والتكنولوجيا..
طب إيه الحاجات اللي مصر تقدر تعتمد عليها أكتر علشان تخفف الضغوط؟
مصر ممكن تعتمد على التنقيب عن مناجم جديدة من الدهب اللي زي منجم السكري، وده ممكن يزود احتياطي الدولة من العملة الصعبة، ده غير الغاز الطبيعي اللي بنصدره لأوروبا وده بيدخل مليارات، ومش بس وكده، ده فيه صادرات زراعية زي البرتقان والبطاطس والعنب وده بيجيب دخل ثابت.
مصر كمان بقت تعتمد على المناطق الصناعية الجديدة، اللي بتجذب شركات أجنبية ودي بتصنع محلي وتصدّر من مصر.
الخلاصة؟.. أن مصر لسه ماشية في برنامج الإصلاح، وتأجيل المرحلة الخامسة مش نهاية العالم، لكن الحل الحقيقي إننا نعتمد على نفسنا، وعلى مواردنا، ونزود الإنتاج والتصدير، عشان مانبقاش تحت رحمة قرارات من برّا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
