هو ايه بالظبط اللى بيحصل في سوق صرف الدولار ؟ وهل العملة الأمريكية بتفقد بريقها فى مصر؟ وليه فجأة الجنيه بيرجع لوضعه الطبيعي وبيستعيد عافيته؟
مفيش شك إن الأسئلة دي كانت بتدور في دماغ كتير من المصريين في الفترة اللي فاتت .. خصوصًا بعد ما شفنا سعر الدولار وهو بيتجاوز الـ 70 جنيه في السوق السودا في أوقات سابقة .. وشفنا كمان تحكمه في مصير كل حاجة في البلد.. من أسعار الأكل والشرب.. للمستقبل الاقتصادي للبلد ككل .. لكن اللي بنشوفه النهاردة بيطمن.. ومؤشرات كتير بتقول إن فيه نور في آخر النفق.
الجنيه المصري عامل شغل عظمه النهاردة .. وكأنه قرر إنه مش هيسكت على اللي حصل فيه .. وفعلاً بيواصل رحلة الصعود أمام الدولار الأمريكي .. ده مش كلام جرايد على فكرة .. دي أرقام وبنوك بتتكلم .. في بداية تعاملات النهاردة .. سعر الدولار تراوح بين 49.36 جنيه للشراء .. و 49.46 جنيه للبيع في معظم البنوك اللي شغالة في السوق المصري .. يعني الدولار بيتراجع .. والجنيه بيتقدم .. ودي في حد ذاتها بشرة خير.
وعشان الصورة تكون أوضح .. كان أعلى سعر للدولار مسجل في البنك التجاري الدولي .. وكان 49.41 جنيه للشراء .. مقابل 49.51 جنيه للبيع .. وبنك مصر سجل الدولار فيه 49.37 جنيه للشراء .. و 49.47 جنيه للبيع .. وحتى بيانات البنك المركزي المصري أكدت الكلام ده .. لما سجل الدولار بنهاية تعاملات أمس التلات .. 49.40 جنيه للشراء .. و 49.50 جنيه للبيع.
السؤال اللي بيطرح نفسه وبقوة .. إيه اللي غير المعادلة دي كلها في الفترة القصيرة دي؟ .. إيه السر ورا عودة الجنيه لبريقه .. واستعادته لعافيته تاني؟
الإجابة ببساطة بتتلخص في كام نقطة مهمة .. كلها بتصب في مصلحة الاقتصاد المصري.
أول حاجة تدفقات النقد الأجنبي .. من ايام هاني جنينة .. رئيس وحدة البحوث في شركة الأهلي فاروس لتداول الأوراق المالية .. قال كلام مهم جداً .. قال إن مصر بدأت تشوف زخم واضح في تدفقات النقد الأجنبي خلال النص التاني من 2024 .. وده مش صدفة .. ده مدفوع بطفرة كبيرة في السياحة .. وتحسن الثقة في الاقتصاد المصري .. وخصوصاً بعد قرارات تحرير سعر الصرف .. اللي كانت خطوة جريئة ومهمة .. والمفروض إنها بتجيب نتايجها دلوقتي.
تانى حاجة قطاع السياحة بيتعافى وبقوة.. رغم الظروف الصعبة اللي مر بيها القطاع .. لكنه دلوقتي بيشهد تعافي ملحوظ .. هاني جنينة أكد إن عدد السياح المتوقع للسنة دي ممكن يوصل لـ 18 مليون سايح .. وده رقم كبير جداً .. بالإيرادات اللي ممكن توصل لـ 16 مليار دولار .. الأرقام دي مش مجرد أرقام .. دي معناها إن فيه عملة صعبة كتير بتدخل البلد .. وده بيعوض جزء كبير من خسائر إيرادات قناة السويس .. اللي للأسف اتأثرت بالتوترات اللي بتحصل حوالينا.
تالت حاجة تحويلات المصريين العاملين بالخارج.. فاكرين لما كنا بنقول إن تحويلات المصريين في الخارج دي كنوز .. أهي الكنوز دي بدأت تظهر نتايجها الملموسة على أرض الواقع .. تحويلات المصريين العاملين في الخارج حققت قفزة غير مسبوقة خلال أول عشر شهور من السنة المالية الحالية .. يعني من يوليو 2024 لحد أبريل 2025 .. الأرقام بتقول إنها ارتفعت بنسبة 77.1% .. عشان توصل لـ 29.4 مليار دولار .. وده رقم ضخم جداً مقارنة بـ 16.6 مليار دولار في نفس الفترة من السنة المالية اللي فاتت .. ده غير إن تحويلات الفترة من يناير لأبريل 2025 ارتفعت بمعدل 72.3% على أساس سنوي .. ووصلت لـ 12.4 مليار دولار .. الأرقام دي كلها بتقول إن فيه دولار كتير جاي من بره .. وده بيخفف الضغط على العملة المحلية.
الأخبار الحلوة مابتخلصش على فكرة .. هاني جنينة كمان رجح إن سعر صرف الجنيه ممكن يتحسن أكتر بنهاية السنة دي .. وده مدفوع بتراجع الدولار على مستوى العالم كله .. خصوصاً قدام اليورو .. اللي بيمثل كتلة كبيرة من الشركاء التجاريين لمصر .. وقال كمان إن سعر الجنيه ممكن يوصل لمستوى 47 أو 48 جنيه للدولار بنهاية 2025 .. وده رقم كويس جداً مقارنة بـ 49.5 جنيه حاليا.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
