أكدت الدكتورة مي أحمد الشحات، مدرس الاقتصاد المنزلي بجامعة حلوان، أن فترة الإجازة الصيفية تمثل فرصة مثالية لتحويل وقت الفراغ إلى وقت إنتاجي للأسرة كلها، سواء من خلال بدء مشروع بسيط أو بتنمية المهارات الحياتية لأفراد الأسرة، حتى لو كان المشروع في بدايته موجهًا فقط لخدمة البيت.
وأضافت مدرس الاقتصاد المنزلي بجامعة حلوان، خلال حوار مع الإعلامية زينب سعد الدين، ببرنامج "البيت"، المذاع على قناة الناس، اليوم الأربعاء: "دلوقتي إحنا في إجازة، والصح مش إننا نوقف حياتنا، لأ، ده وقت ذهبي نبدأ فيه مشروع حتى لو بسيط، ينفع نشتغل كأسر منتجة، ولو حتى لنفسنا وأهل بيتنا، والمهم إننا نوازن بين الراحة والإنتاج، مش لازم نضغط على الأولاد، لكن نستثمر أوقات فراغهم بذكاء".
وشددت على أهمية استغلال مهارات الأبناء بحسب ميولهم، وليس بفرض أعمال لا يحبونها عليهم، موضحة: "مش لازم أولادي يشتغلوا في اللي أنا بحبه، ولا أنا أفرض عليهم يدخلوا في مشروع مش بيحبوه، لو ابني بيحب السوشيال ميديا، أخليه يساعدني في تسويق المنتج، لو بنتي بتحب تعمل إكسسوارات، دي بداية ممتازة إنها تبدأ مشروعها الصغير، حتى لو بس تعمل لنفسها وتوفّر بدل ما تشتري".
وأشارت د. مي إلى أهمية إشراك الأبناء في الأعمال المنزلية كجزء من المهارات الحياتية الأساسية، مضيفة: "دي مش رفاهية، دي ضرورة.. الولد أو البنت لازم يعرفوا ينظموا غرفتهم، يرجعوا حاجاتهم مكانها، لازم يشاركوا في البيت، دي مسؤولية ومهارة حياتية، مش مجرد شغل".
كما شجعت الأمهات على استغلال وقت الأطفال بطريقة غير مباشرة، موضحة: "مش لازم أقول له اقعد واشتغل، لكن أستغل وجوده في البيت، وأقوله طب ساعدني، طب شوف المنتج ده لو عجبك سوّقه لصحابك، أو اعمل فيديو بسيط... كده بيشتغل وهو مش حاسس، وبيتعلم ويكبر ويفيدني".
ووجهت رسالة للأمهات والشباب: "مافيش حاجة اسمها (أنا مش بعرف أعمل حاجة)... كلنا عندنا حاجة نقدر نقدمها، وكل بيت فيه فرصة إنه يبقى منتج، الإجازة مش بس راحة، هي انطلاقة جديدة، ولو كل واحد بدأ بخطوة بسيطة، هنوصل لحياة أفضل ونساعد ولادنا يبقوا شركاء حقيقيين في البيت والمستقبل".
إخلاء مسؤولية إن موقع عاجل نيوز يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
