هو ليه البنك المركزي المصري بيشتري دهب كتير الفترة دي؟ وإيه علاقة الدهب بالدولار؟ وهل البنوك المركزية في العالم كلها بتعمل كده ولا دي حاجة خاصة بينا؟ وليه ده ممكن يأثر على سعر الدهب عالميا؟
خلال أول خمس شهور من 2025.. البنك المركزي المصري زوّد احتياطياته من الدهب بنسبة 25.8% .. يعني زادت بحوالي 139 مليار جنيه ، وبقت الأرصدة الإجمالية من الدهب وصلت لـ 679.6 مليار جنيه في نهاية مايو .. بعد ما كانت 540.4 مليار جنيه في نهاية ديسمبر اللي فات.
ده معناه إن المركزي بيشوف في الدهب أمان.. بالذات في وقت كل حاجة فيه بتتغير بسرعة.. من فوايد بتقل لحروب بتحصل لعملات بتتراجع.
بس ليه المركزي بيعمل كده ؟ وليه دلوقتي تحديدا ؟
لأن ببساطة.. أسعار الدهب عالمياً بتكسر أرقام قياسية.. يعني مثلا من أول السنة ولحد نهاية مايو الدهب ارتفع بنسبة 20% يعني حوالي 667 دولار زيادة في الأونصة ووصل لـ3284 دولار في مايو بعد ما كان 2617 دولار في أول السنة.
وده بسبب حاجتين رئيسيتين أولهم التوترات الجيوسياسية.. من الشرق الأوسط لآسيا وتانيهم اتجاه البنوك المركزية في العالم لخفض أسعار الفايدة.. كل ده بيخلي الناس تدور على ملاذ آمن.. سواء كانوا أفراد أو مؤسسات.. أو حتى بنوك مركزية .. وطبعاً مفيش أأمن من الدهب.
بس الأهم من كده إن في بنوك مركزية حول العالم بدأت فعلاً تزود احتياطاتها من الدهب .. وده بقى اتجاه عالمي .. يعني مصر مش لوحدها.. البنك المركزي هنا ماشي على نفس الطريق اللي ماشيين فيه أمريكا والصين وروسيا ودول كتير.
طب إيه تأثير ده على سعر الدهب؟
كل ما الطلب على الدهب يزيد.. سواء من بنوك مركزية أو مستثمرين.. سعره غالباً هيكمل في الصعود.. وده اللي المحللين بيتوقعوه فعلاً.. وفيه كلام إن سعر الدهب هيكمل ارتفاعه السنة الجاية كمان.
لكن خلي بالك.. مش كل الزيادة في أرصدة الدهب معناها شراء جديد.. جزء كبير من الزيادة بيجي من فرق السعر نفسه.. يعني القيمة السوقية للدهب بتعلى فبتظهر في ميزانية البنك المركزي على إنها زيادة في الأرصدة.
اللى لازم تكون عارفو ان البنك المركزي مش بيشتري دهب عشان يخزنه وخلاص لأ.. دي خطوة محسوبة في خطة أمان مالي.. في وقت العالم فيه مش مستقر.. والدولار بقى عليه تساؤلات كتير.. فطبيعي نشوف البنوك المركزية بتلجأ للدهب كوسيلة لحماية أصولها.
السؤال اللي شاغل العالم كله هل الاتجاه ده هيستمر؟ وإمتى ممكن نلاقي الدهب فعلاً بقى هو الأصل رقم واحد في العالم؟
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
