يا ترى إيه سر التعاون الجديد بين مصر والصين، والتنين الصيني بيشتغل علي إيه في مصر دلوقتي، وليه الموضوع ده مهم أوي لشباب المشروعات الصغيرة؟
في المعرض الدولي للمشروعات الصغيرة اللي اتعمل في مدينة جوانزو بالصين، مصر كانت ضيف شرف، والفرصة دي ما راحتش هدر، لأ بالعكس.
واللي حصل، إن قيادات من جهاز تنمية المشروعات وهيئة المعارض عملوا اجتماعات مهمة مع جهات صينية، علشان يفتحوا باب تعاون ضخم بين البلدين، وخاصة في دعم المشروعات الصغيرة.
والموضوع مش بس كلام، ده فعليا بيتم دراسة نقل التجربة الصينية الناجحة جدا في دعم المشروعات الصغيرة للسوق المصري، يعني نبدأ نشوف أدوات تمويل وكمان تدريب، وفوق كل ده إنتاج وتكنولوجيا تخلي الشاب المصري يقدر يفتح مشروع وينجح فيه ويكمل.
وطبعا، لما نقول الصين، يبقى بنتكلم عن دولة قدرت توفر ملايين فرص العمل من خلال المشروعات الصغيرة، ورفعت اقتصادها زي الكبار، وده اللي مصر بتحاول تستفيد منه حاليا، وبتحط خطة كاملة لنقل النموذج ده عندنا، خاصة في الصناعة والإنتاج.
طب دلوقتي، احنا كمصريين وشباب عنده حلم بمشروع صغير.. هنستفيد إزاي؟
بص با سيدي، أول حاجة هي إن السوق الصيني ممكن يفتح أبوابه للمنتجات المصرية الصغيرة، يعني لو بتصنع منتج يدوي، أو صناعي بسيط، ممكن تشارك في معارض، وتدخل واحدة من أكبر أسواق العالم.
تاني حاجة، الجهاز المصري بدأ يتحرك عشان يوفر فرص تدريب وتمويل وتكنولوجيا جايه من الصين، يعني مشروعاتك تقدر تكبر وتتطور، لأنك هتاخد دعم على مستوى عالمي.
بردو، مشاركة مصر في المعارض الصينية معناها إن في تعاقدات جديدة ممكن تتفتح قدام المشروعات الصغيرة، وده هيساعد البيزنس بتاعك يتوسع ويصدر كمان.
عندك كمان، الاتفاقات دي هتساهم في توطين الصناعة وتقليل الاستيراد، وده معناه طلب أعلى على المنتج المحلي، يعني فرص أكتر تبيع وتكسب.
بردو، في دعم حقيقي من الدولة وجهاز تنمية المشروعات لفتح الأسواق دي، بالتعاون مع وزارة الاستثمار والتجارة، وده هيخلي حلم المشروع مش بس سهل، لكن كمان مربح ومستقر.
والتجربة الصينية فيها أفكار جديدة زي التجمعات الصناعية الصغيرة، والمناطق الإنتاجية المتخصصة، ودي ممكن نشوفها في مصر قريب، وهتكون بيئة ممتازة لأي حد عايز يبدأ مشروع وينجح فيه.
وفي النهاية، نقدر نقولك إن التعاون المصري الصيني ده مش مجرد إجراء وخلاص، لأ دي بداية حقيقية لفرص كبيرة جدا لأي شاب نفسه يبدأ مشروع صغير ويلاقي دعم حقيقي يوصله للعالمية.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
