حذر محمد نصر المخرج الرياضي الشهير الأهلي من التفريط في وسام أبو علي مهاجمه وهدافه في الانتقالات الصيفية الجارية، وذلك بعدما ربطت تقارير وسام بعروض أمريكية وخليجية بمقابل مالي كبير للغاية.
وسام أبو علي تألق مع الأهلي في مونديال الأندية وسجل "هاتريك" في مواجهة بورتو البرتغالي التي انتهت بالتعادل الإيجابي بأربعة أهداف لكل فريق، وودع الأحمر المنافسات من مرحلة المجموعات بعدما جمع نقطتين فقط.
وكتب محمد نصر على حسابه على فيسبوك: "هقول كلمتين وكله على الله.. اوعى تبيع وسامأابو علي حتى ولو وصل سعره أكتر من ١٢ مليون دولار لأن الراجل ده خد ثقة وطور لعبه وشوية ويعدى فيليكس وفلافيو.. إذا كان هناك مهاجم أجمد من وسام في أوروبا وسعره مش معدي العرض ده تبيعه وقتها هتقولي نشتري مصطفى محمد هقولك وسام أفضل ومصطفى ممكن يرفض أي عرض بأى سعر وانسى أي مهاجم محلي فيصل ولا شريف ولا غيرهم لأن وسام الأفضل بس لازم مهاجم منهم مع وسام وجراديشار".
"مافيش حد ينافس وسام في مصر الا مايلي فقط هتعرف تجيب مايلي لو روحت لبيراميدز هيقولك بـ٢٥ مليون دولار على فكرة أنتم لكم حرية البيع والشراء أنا بتكلم بلسان بعض الجماهير بس".
"ديانج لا إعارة ولا بيع مش هتعرف تجيب كواليتى زيه خالص وكفاية إنك ضيعت قندوسي منك، كمان أحمد عبدالقادر لعيب مهاري عايز ظبط زوايا بس وهينفعك جدًا ماتفرطش فيه إعارة ولا بيع وفيه جمهور بيقولك استغنى عن جراديشار هيتخطف في ثانية لأن عنده كتير ولسة صغير ده عمل اسيست بصباع قدمه الخارجي ماركة أبو تريكة عالمي غير أسيست بن شرقي في الزمالك يعنى هييجي منه قوي".
"الوحيد اللي يتزعل عليه صراحة هو حسين الشحات اللي قدم عظمة في الأهلى وسطر تاريخ كبير بفنياته وأهدافه لكن لكل عبقري نهاية، وأفشة اللي خلص نهائي القرن بالقاضية ده بصراحة يشفع له لأخر نفس ليه مع الأهلي وقاضية في الزمالك في كأس مصر وقاضية في بيراميدز ببطولة دوري وأهداف جميلة ومستوى عالي مش عارف أيه اللي حصل لك ده حرام ياأفشة".
"نجومك الشباب حافظ عليهم شوف منهم مدافعين كويسين تخليهم وعبد الله وكباكا وغيرهم خليهم إعارات بس لإنك بتبيع وترجع تاخدهم بملايين أنت رجعت نيدفيد وفخري عملوا أيه ولا حاجة وبيكهام مرتين بيرجع وهترجع شكري وعايز الجزار اللي أنت سيبته مرتين بيع نهائي وأنت محتاج صفقة مدافعين شاملة الخط كله".
"بلاش تقضي على شوبير لو أبوه كان أيوب وقعد احتياطي لاكرامي وثابت ٧ سنين مصطفى مش هيتحمل ده وسيحا كمان لازم يلعب لأن الفريق القوي دايمًا عنده حراس جامدين".
"مع اسكواد خط وسط بن رمضان وديانج وإمام وقدامهم زيزو ووسام وشرقي أو ترزيجيه قماشة عالمية محتاجة حارس وخط دفاع نفس المستوى علشان تعمل اللى عمله جوزيه بفريق القرن بتاعه".
