هي ايه قصة تحذير صندوق النقد الدولي الأخيرة، وليه طلع يحذر العالم من أزمة اقتصادية جديدة، وإيه السبب اللي مخليه قلقان من ضربات أمريكا على إيران، وهل فعلا اللي بيحصل هيأثر على الأسعار؟
في الساعات الأخيرة، مديرة صندوق النقد الدولي كريستالينا جورجييفا، طلعت بتصريحات تقلق شوية، وقالت إن الضربات الأمريكية على إيران ممكن يبقى ليها آثار أوسع من مجرد إنها تزود سعر الطاقة، وإننا داخلين على فترة عدم يقين كبيرة أوي على مستوى العالم.
والكلام ده معناه إن القصة مش بس أسعار بترول طالعة ولا نازلة، لأ ده ممكن يأثر على كل القطاعات.
كريستالينا، قالت كمان إن الاقتصاد العالمي أصلا كان شايل هم كبير من الأول بسبب التوترات والحرووب والتضخم، وإن الضربات الجديدة دي هتزود الضغط على الكل، يعني الأسعار هتزيد والأسواق هتتراجع، خاصة وإننا أصلاً شايفين تباطؤ من الأول، والربع الأول والتاني من 2025 مش شاكلين إنهم أحسن بكتير.
طب ليه القلق ده كله؟
بص يا سيدي، السبب الأول زي ما قلنا، إن أسعار الطاقة دايما أول حاجة بتتحرك بسبب الحروب، وبعدين بيحصل تأثير بردو على باقي القطاعات زي الصناعة والنقل والتجارة، يعني الاقتصاد كله بيتأثر، وده اللي بيخلي المؤسسات الكبيرة زي صندوق النقد الدولي تقلق وتطلع تحذر.
وفوق كل ده، إحنا في مصر بنتأثر دايما بالظروف الدولية، سواء من ناحية سعر الدولار أو أسعار السلع وأي توتر على مستوى العالم.
طب نعمل إيه؟
بص يا سيدي، اازم تخل تعمل حسابك على تقلبات الأسعار، وشوف دايما إيه اللي بيتحرك بره علشان تفهم السوق ماشي على فين، ولو بتفكر تستثمر أو حتى تعمل مشروع، فخليك حذر شوية ومتابع الأخبار الاقتصادية أول بأول، لإن العالم داخل على فترة محتاجة شوية تركيز.
أما بقى على المستوى البعيد، فالخبرا دايمل شايفين إن فترات القلق دي ما بتستمرش للأبد، وإن الاقتصاد بيعيد ترتيب أوراقه، بس اللي بيبقى مستعد هو اللي بيكسب، فتابع دايمًا، واقرا وشوف وأعمل خطة بديلة، لإن الأيام اللي جاية محتاجة شوية وعي وتخطيط.
فوق كل ده، لازم ناخد بالنا من حاجة مهمة أوي، وهي إن العالم أصلا كان بيعاني من ضعف في سلاسل التوريد بسبب أزمات سابقة زي وباء كورونا والحرب الروسية الأوكرانية، فالضربات الأخيرة دي ممكن تزود الطين بلة وتخلي شحن البضائع من وإلى مناطق النزاعات زي منطقة ااشرق الأوسط أصعب وأغلى، وده بدوره هينعكس على أسعار السلع الاستهلاكية وحتى المنتجات اليومية اللي بنستخدمها.
وبجانب ده، في دول كتير من الأسواق الناشئة زي مصر هتحس بالضغط على ميزانياتها أكتر، لإنها مضطرة تدور على بدائل وتدفع تكاليف أعلى لاستيراد نفس السلع والخدمات، فعشان كده دايما بنقول إن متابعة التطورات الاقتصادية مش رفاهية، دي حاجة أساسية تساعدنا نرتب أولوياتنا وناخد بالنا من تقلبات الأسعار قبل ما تحصل.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
