هي مصر هتستفيد ايه من وقف الحرب بين إسرائيل وإيران.. وايه حكاية مليارات الدولارات اللي هتيجي مصر في الأيام والشهور الجاية وايه تأثير دا على سعر الدولار.
أخيرا الحرب وقفت في الشرق الأوسط بين إسرائيل وإيران بعد قرار وقف إطلاق النار بين الطرفين.. طبعا دا خبر سعيد جدا لمصر لأسباب كتير جدا أولها أن حجوزات السياحة هترجع تقفز تاني بعد تراجعها بسبب الحرب ومصر قبل اندلاع الاشتباكات كانت في انتظار موسم سياحي تاريخي ودلوقتي الامل رجع تاني ومصر بتنتظر اكتر من 16 مليار دولار الموسم دا بعد المشروعات الضخمة اللي خلصت في القطاع السياحي أولها المتحف المصري الكبير واللي كانت مصر هتفتتحه رسميا لكن الأحداث الأخيرة اجلته عشان ياخد الشو عالميا بحفل افتتاح اسطوري هيقلب سوق السياحة في المنطقة ودلوقتي أكيد الحكومة هتعلن موعد قريب جدا لافتتاحه.
كمان المشروعات السياحية اللي خلصت في العلمين الجديدة والساحل الشمالي بشكل عام وغير مشروع التجلي الأعظم في سيناء ومشروعات زيادة السعة الفندقية للقطاع السياحي.. كل ده بيقول إن موسم السياحة ملحقش ينضرب ومصر في انتظار ملايين السياح في الصيف دا.
كمان وقف الحرب هيكون ليه تأثير مباشر على انخفاض سعر النفط واسعار السلع الاستراتيجية ودا هيوفر بشكل كبير في فاتورة الاستيراد من الخارج.. ومش كده وبس كمان توقف العمليات العسكرية هيساعد في زيادة تدفقات الأموال الساخنة في سوق اذون الخزانة والسندات المصرية ورغم خطورة الأموال الساخنة لكن في نفس الوقت بتعمل حالة زخم وزيادة في معروض الدولار في البنوك.
مصر على موعد كمان مع عودة إيرادات قناة السويس من جديد بعد زوال الخطر في المجري الملاحي ودا هيرجع مليارات الدولارات اللي اتحرمت منها مصر على مدار السنة الشهور الأخيرة ووصلت الخسارة لمليار دولار في الشهر الواحد..
في نفس الوقت مصر هتستقبل استثمارات جديدة نتيجة حالة الاستقرار في المنطقة وهترفع معدلات النمو وهتقلل معدلات التضخم في الأسواق مع انتهاء الاضطرابات العالمية.
طيب ايه تأثير توقف الحرب على سعر الدولار في السوق المصري ؟
طبعا زي ما قلنا إن وقف الصراع هيرجع مليارات الدولارات السوق المصري من السياحة والاستثمار المباشرة وغير المباشرة ومن عودة الملاحة لقناه السويس واللي كانت بدأت ترجع بالفعل وخاصة سفن الحاويات العملاقة واي زيادة في معروض الدولار معناه انخفاض سعر العملة الأمريكية وزيادة قوة الجنيه المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
