تحرك مفاجئ في أسعار الذهب في مصر.. شوف اللي هيحصل

يا ترى إيه اللي بيحصل لأسعار الدهب، وليه اتحركت شوية لفوق بعد ما كان الدنيا هادية شوية الفترة اللي فاتت، طب يا ترى إيه السبب، وهل ده بداية لموجة ارتفاع جديدة؟

في الحقيقة، أسعار الدهب ارتفعت انهاردة حوالي 50 جنيه للجرام بعد ما سعر الدولار زاد مقابل الجنيه، وده غير إن الجنيه الدهب زاد حوالي 400 جنيه هو كمان، وده لأن سعر المعدن الأصفر بيتأثر دايما بالدولار والعوامل المحلية وكمان الإقليمية زي الحروب والأزمات السياسية.

وانهاردة، الدهب عيار 24 سجل حوالي 5543 جنيه، وعيار 21 اللي هو اكصر مبيعا سجل 4850 جنيه بدون مصنعية، وعيار 18 عامل 4175 جنيه، والجنيه الدهب واقف عند 38,800 جنيه، أما عالميا فسعر الأونصة وصل 3368 دولار.

طب ليه الدهب بيتحرك أصلًا؟

بص يا سيدي، السبب الأول هو إن سعر الدولار بيتحرك دايما وبيرفع الدهب معاه، ده غير التوترات اللي بتحصل على المستوى الدولي زي المواجهات والحروب خاصة الحرب بين إيران وإسرائيل، وده بيخلي المستثمرين يلجأوا للدهب كمخزن قيمة وأمان ليهم لانه ملاذ آمن.

وفوق كل ده، إحنا كمصريين أصلا بنحب الدهب من زمان أوي سواء عشان الشبكة أو للادخار، وده اللي بيخلي دايما في طلب عالي حتى في أوقات الركود العالمي.

طب نشتري دلوقتي ولا نستني شوية؟
بص يا سيدي، الخبراء دايما بيقولوا إن الدهب أمان على المدى الطويل، خاصة وسط الضغوط الاقتصادية، بس لو هدفك تكسب على المدى القريب فيبقى محتاج تستنى وتشوف الأسعار هتتحرك على فين الأول.

والقاعدة هنا بسيطة، معاك فلوس زايدة وناوي على الادخار فاشتري وماتقلقش، أنا بقى لو مضارب وبتدور على فرق السعر فاستنى لحد ما الدنيا توضح أكتر.

كمان، لازم ناخد بالنا من حاجة مهمة، وهي المواسم والأعياد، فداميا قبل المواسم زي العيد والصيف بنلاقي ناس كتير داخلة تشتري شبكات ومصوغات، وده بيرفع الضغط على الأسعار شوية، فلو عندك خطة للشراء، ممكن تستغل الفترات الهادية زي دلوقتي قبل ما يزيد الإقبال ويغلي الدهب أكتر.

أما بقى على المدى البعيد، فالخبراء شايفين إن الدهب من أكتر الاستثمارات أمانل، خصوصا وإنه على مدار السنين دايما بيحافظ على قيمته مهما حصل من تقلبات. يعني حتى لو السعر نزل شوية دلوقتي، دايما هيرجع يعلى على المدى الأطول، فاللي بيفكر يشيل فلوسه في حاجة مضمونة، فالدهب دايما بيكون الاختيار الأول من زمان لحد النهاردة.