سمعنا كتير عن مصطلح الأموال الساخنة واللي رجعت تظهر بشكل كبير جدا في الوقت الحالي.. ياتري اية هيا الفلوس دي واية فايديتها للاقتصاد المصري.. وهل لها اضرار علي المدي البعيد أو القصير علي الاقتصاد المصري.
منطقة الشرق الأوسط في الوقت الحالي بتمر بتحديات غير مسبوقة، وفي عز التحديات دي مصر استقبلت ارقام كبيرة من الأموال الساخنة وسجلت معاملات العرب والأجانب صافي شراء وصل لـ 396 مليون دولار للأذون والسندات الحكومية من خلال السوق الثانوي في البورصة.
التدفقات الكبيرة اللي شهدتها السوق المصري للاموال الساخنة خفضت الضغوط على الجنيه، ده اللي خلي الدولار تقل مكاسبه لارقام صغيرة عكس كل التوقعات واللي كانت بتأكد أن الدولار مرشح لتحقيق مكاسب كبيرة، وحاليا مصر بتستعد لإصدار صكوك سيادية قبل نهاية الشهر الحالي بقيمة هتوصل لـ2 مليار دولار.
الفترة اللي فاتت وتحديدا من 2015، الحكومة سددت أكثر من 1.5 مليار دولار سندات دولارية كانت طرحتها، وحاليا الدولة اتجهت لخطة جديدة لخفض الدين العام والخطة دي وافق عليها الرئيس عبد الفتاح السيسي بإصدار قرار بإصدار قرار بنقل ملكية أراضي لوزارة المالية، علشان تستخدمها في خفض الديون الخارجية، وقطعة الأرض دي واللي موجودة في منطقة البحر الأحمر هتكون مخصصة للدخول في بعض الصفقات والشراكات مع بعض جهات الدولة اللي شغالة في القطاع المالي، وبعض الهيئات الاقتصادية، وهتكون عائدتها مخصصة لاستبدال جزء من المديونية الموجودة على أجهزة الموازنة للجهات الخارجية مقابل الدخول في استثمارات مشتركة.
طيب هل في عيوب ومميزات للأموال الساخنة علي الأقتصاد المصري ؟.
الأموال الساحنة دي عبارة عن فلوس بتدخل البلد مع مستثمرين أجانب وبيحطوها في سندات أو يدخلوا البورصة، علشان يستفيدوا من فرق سعر الفايدة أو سعر العملة، ولما الدنيا بتسخن شوية أو يحصل توتر، يقوموا واخدين فلوسهم ومشايين، خصوصا أن مصر كانت بتقدم ارقام عالية جدا في الفايدة، واللي كان بيخلي في اقبال كبير من المستثمرين علي الدخول للسوق المصري للاستفادة من فرق العملة.
المشكلة الكبيرة في موضوع الأموال الساخنة دي أنها فلوس مش بيتم استثمارها في مشاريع طويلة المدى، ولا بتدخل في بناء مصانع ولا هدفها اتاحة فرص عمل جديدة للشباب المصري، ولكن هدفها الاستفادة من الفايدة العالية اللي بيقدمها مصر، والحكومة بتستخدمها في سداد الديون الخارجية.
الخطورة الكبيرة اللي بتسببها الأموال الساخنة أن اصحابها بيجي في أي وقت يسحبوا فلوسهم وبالسلامة، ودي بيعمل ازمة كبيرة جدا وبيكون سبب في اختفاء ونقص العملات الأجنبية في مصر، وده كان السبب الرئيسي في الأزمة اللي حصلت في الفترة اللي فاتت واللي كانت فيها مصر بتعاني من نقص شديد في العملات الأجنبية في البنوك، وكان السبب فيها خروج نسبة كبيرة من الأموال الساخنة من الاقتصاد المصري.
إخلاء مسؤولية إن موقع عاجل الإخباري يعمل بطريقة آلية دون تدخل بشري،ولذلك فإن جميع المقالات والاخبار والتعليقات المنشوره في الموقع مسؤولية أصحابها وإداره الموقع لا تتحمل أي مسؤولية أدبية او قانونية عن محتوى الموقع.
